Di sinku detenshon relashoná ku investigashon TRES BELLE

Di sinku detenshon relashoná ku investigashon TRES BELLE

Djabièrne último un di sinku sospechoso a keda detené den e investigashon di trafikashon di hende, TRES BELLE. Ta trata di un agente di viaje ku tabata buk tiket pa e trago-meisje nan. E agente di viaje ta wòrdu sospechá di komplisidat na kontrabanda di hende dor di a regla tiket pa e damanan Venesolano riba petishon di e doño di bar i sospechoso prinsipal den e investigashon. Si un agente di viaje ta na altura ku e tiketnan ku e ta buk ta pa e damasnan ku probablemente lo bai traha den un snèk, e ora ei e agente – segun OM – ta hasi su mes komplise na kontrabanda di hende. Un agente di viaje no por skonde tras di e echo ku ta simplemente su trabou e ta hasi.

Ta trata di kontrabanda di hende ora ku bo yuda un persona ku entrada i/o estadia na Kòrsou, sabiendo ku estadia di e persona aki ta ilegal. Si un dama Venesolano keda Kòrsou i ta trahando, e ta illegal maske ku e ta kedando den su promé luna. E echo ku e ta trahando mesora ta hasi su estadia ilegal. Esaki lo ta otro si e dama tin un permit di estadia of di trabou.

Awe e agente di viaje lo mester presenta dilanti wes komisario.

Un par di dia pasá e otro kuater sospechoso nan den e investigashon TRES BELLE a wòrdu suspende for di enkarselashon preventivo. OM a bai den apelashon kontra di e desishon aki pa loke ta trata tres di e kuater sospechoso nan. E investigashon polisial pa loke ta trata TRES BELLE ta kontinua.