Juanita Graciela Martinus – Beukenboom a kumpli e bunita edat di 100 aña
Juanita Graciela Martinus – Beukenboom a kumpli e bunita edat di 100 aña
Sra. Juanita Martinus – Beukenboom, mihó konosí komo Chela, tambe a kaba di join e klup di Sentenarionan. Mai Chela a nase na aña 1919 i ta oriundo di Antriol, Boneiru. Su sr. Esposo, Carlos Martinus, tambe ta na bida i huntu nan tin 4 yu, 10 ñetu i 6 bisañetu. Un poko tempu pasá, Mai su ruman muhé, Maria Giskus – Beukenboom, a fayesé algun dia promé e kumpli 100 aña. Si Dios no a tuma Maria den su Reino, awe Maria lo tabatin 101 aña is u ruman Chela 100. Mai Chela ta un dama pèrtinènt, balente i den bon kondishon. Ántes, despues di a kaba skol, Mai a bai traha den pakus na Playa i 18 di ougústús 1949, Mai a bin kasa na Kòrsou, pues den luna di ougùstùs próksimo, Mai i su galan ku tambe ta rumbo 100 aña ta kumpli 70 aña di bida matrimonial. Te ku Mai su 90 aña, Mai tabata traha pastechi i kuida su matanan den kurá. Mai Chela stima su karni kabritu i piská kòrá. Tambe Mai Chela gusta ambiente i kòmbersá—Mai ta semper kla pa risibí bishita. Te ku su 90 aña e tabata traha pastechi i kuida su matanan den kura. Riba dia di Mai su kumpleaño, Mai a bai tuma su bendishon mainta den Katedral di Pietermaai serka Obispo Luis Secco i anochi tabatin un fiesta grandi pa Mai na su kas, di kual mas ku 100 famia- i amigunan a bin for di diferente parti di mundu pa selebrá Mai Chela su 100 aña di bida. Fundashon Nos Grandinan ta uni ku famia i demas sernan yegá na Mai Chela pa bolbe deseá Mai Chela bida, forsa i salú pa nos por tin Mai Chela pa hopi aña mas huntu ku nos.