YAMADA NA HENDENAN KU TABATIN KONTAKTO KU HUÉSPET DI SUNSCAPE HOTEL.

YAMADA NA HENDENAN KU TABATIN KONTAKTO KU HUÉSPET DI SUNSCAPE HOTEL.

Nos ta hasi un yamada na personanan ku tabatin kontakto ku huéspetnan di, òf a bishitá Sunscape Hotel durante e dianan 15, 16, 17, 18 i 19 di yüli pa tuma kontakto pa mas informashon ku GGD yamando number 9345 òf 0800-0888 (grátis) durante orario di ofisina.

Esnan ku tabatin kontakto ku huéspetnan di Sunscape Hotel entre 15 i 19 di yüli por risibí e vakuná, si ta nesesario, na Ofisina di Vakunashon pa Adulto di GGD na Zakitó. Por bèl e enfermera pa splikashon òf un sita na telefòn 432-2860. Si no haña kontesta por laga nòmber i number di telefòn den e mashin di kontestá i lo tuma kontakto ku bo.

EN GENERAL

Ta pidi tur mayor pa sòru ku muchanan ta vakuná segun e skema di vakunashon di Departamento Salú Hubenil. Pa bo konfirmá ku bo yu(nan) a pasa e vakunanan konsulta e karchi di vakunashon.

SÍNTOMANAN DI SARAMPI TA:
Keintura haltu ku ta kuminsá direpente, tosamentu, nanishi ta kore, wowo kòrá ku ta kore awa. Tres pa sinku dia despues di a kuminsá bira malu e persona ta haña iritashon di kueru (rash, uitslag) ku ta kuminsá aparesé na e rant di kabei, despues sigui na kara, despues kurpa, i finalmente na man ku pia.

Ministerio di Salubridat, Medio Ambiente i Naturalesa ta informá tokante kaso di Sarampi serka turista, huéspet di un hotèl lokal.

Riba djabièrnè, 19 di yüli 2019, a identifiká un kaso konfirmá di sarampi. Ta trata di un turista. E persona aki a kuminsá sinti malu algun dia pasá i a konsultá un dòkter di kas riba djabièrnè mainta. Despues di realisá e tèstnan di laboratorio nesesario, a konfirmá ku e persona tin sarampi.

E turista a yega nos isla riba 15 di yüli. El a kuminsá sinti su kurpa malu i tabatin keintura algun dia promé, i desaroyá rash/uitslag riba 17 di yüli. Esaki ta indiká ku e persona NO A KONTAGIÁ NA KÒRSOU.

A base di kálkulonan por bisa ku e pashènt por a pasa e vírùs di sarampi for di dia 12 di yüli i lo ta kontagioso pa otronan te ku 21 di yüli próksimo.

Mes dia di konfirmashon di e kaso, GGD a komuniká ku e gerensia i a bishitá e hotèl konserní. Despues di un seshon di informashon na e gerensia i trahadónan i e hotèl a ofresé e personal e vakuna kontra di sarampi. E proseso di vakuná lo kontinuá durante henter wikènt pa e sobrá personal i pa e huéspetnan di e hotèl. Vakunashon ta importante den prevenshon, spesialmente serka un malesa asina kontagioso manera sarampi, sinembargo e vakunashon ta totalmente voluntario.

CHÈNS DI KONTAGIO
Mirando ku e persona tabata infeksioso den su periodo na Kòrsou, mester tene kuenta ku e lo por tabatin kontakto ku personanan lokal i ku esakinan lo por a pega ku e vírùs.
Pa e persona ku a yega di haña sarampi e chèns di pega ku e vírùs i desaroyá e malesa ta práktikamente sero. E persona ku a risibí e vakuna kontra sarampi, ta kore un riesgo hopi chikí di desaroyá e malesa den un forma mas leve.

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: