KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

FARANDULA - SOSIAL - ARTENOTISIA

Sentro Kultural Kòrsou ta klousurá su kurso di “Baile di Kas’i Orgel”

Sentro Kultural Kòrsou ta klousurá su kurso di “Baile di Kas’i Orgel”

Durante e periodo 10 di aprel te ku 10 di yüli 2019 Sentro Kultural Kòrsou a organisá den kuadro di Aña di Ka’i Orgel 2019 un Kurso Básiko di Baile di Ka’i Orgel. E  kurso tabata na enkargo di e konosido artista Adriano Cesáreo Jean Louis i a keda tené den su Sentro na Emmastad. Den e kurso e kursantenan a siña kón ta balia nos Mazurka,Wals, Dansa, Fòks i tambe e ritmo di Tumba, tur toká riba Ka’i Orgel.  

Dia 14 di yüli último Sentro Kultural Kòrsou a klousurá e kurso aki ku un Atardi Kultural, durante kua e kursantenan, despues di a duna un presentashon di baile di Ka’i Orgel, a risibí nan sertifikado for di man di señor Cesáreo Jean Louis i di señor Frank Hanze, miembro di Direktiva di Sentro Kultural Kòrsou. 

Esnan ku a risibí nan sertifikado ta: Jeannette Girigorie, Jessie de Haan, Ingrid M. Haile-Hato, Jinèsa Hato-Martina, Oswin Martina, Xiomara Martina,  Josephine I. Richardson i Zoila M. Tujeehut.

Sentro Kultural Kòrsou por mira bèk riba un Atardi Kultural hopi ameno i alabes un èksitoso klousura di su kurso di baile di Ka’i Orgel.

Durante e Atardi tabatin tambe un bunita presentashon di kursantenan di Skol di Baile Ritmo Kultural Kòrsou. Músika tabata na enkargo di DJ WhyTy i Ka’i Orgel “Guillermina”

Leave a Reply

This site uses Akismet to reduce spam. Learn how your comment data is processed.