Hòmber ta muri den kas ku ta kima.

KOMUNIKADO DI PRENSA 344 / 2019
1 sèptèmber 2019
Hòmber ta muri den kas ku ta kima.
Departamentu di Komunikashon i Prevenshon
KUERPO POLISIAL KÒRSOU SIRBI I PROTEHÁ

Djasabra anochi dia 31 di ougùstùs, alrededor di 22.29’or, Sentral di Polis a risibí
informashon di un kas ku tabata na kandela den Montezumaweg.
Mesora a dirigí unidat di Rio Canario i tambe brantwer na e sitio.
Na yegada di polis, nan a topa un kas di tabla ku tabata kompletamente na kandela.
Personanan den besindario a deklará ku nan a logra saka un dama for di e kas ku ya a
inhalá hopi huma.
Ku ambulans a transport’é pa poliklínika pa tratamentu médiko.
Den e kas tabatin un hòmber tambe, pero debí ku kandela a kue e kas rápidamente, no
por a saka e último aki for di den e kas.
Despues ku bomberonan a logra paga e kandela ku a destruí e kas kompletamente, a
bin topa ku kurpa sin bida di e hòmber Franklin Alberto Gosepa, nase na Kòrsou dia
6 di ougùstùs 1946.
E hòmber aki a kima kompletamente.
Riba òrdu di fiskal di Ministerio Públiko a konfiská e kurpa, pa mas investigashon.
Investigashon den e kaso aki ta kontinuá.