EKSITOSO MISHON DI POLITUR I CTB NA SANTO DOMINGO

EKSITOSO MISHON DI POLITUR I CTB NA SANTO DOMINGO

Den kuadro di un areglo di koperashon estrecho entre Politur i CTB di Kòrsou ku CESTUR (Cuerpo Especializado de Seguridat Turístiko) di Repúblika Dominikana, un delegashon di Politur i CTB di Kòrsou a reuní ultimo dianan aki na Republika Dominikana ku alto funshonarionan di CESTUR i di e Gobièrnu Dominicano, más en partikular e Ministerio di Turismo.

E delegashon di Kòrsou a konsistí di miembronan di direktiva di Politur Sr. Ritzel Godfried (alabes representando CTB), Sr. Imro Zwerwer (alabes representando KPC), Sr. Paul de Kloet, seguridat na disposishon di Politur i Sr. Humphrey Josefa den su kalidat di Presidente di Politur.

Na Puerto Plata e delegashon di Kòrsou a reuní ku e Vise Minister di Turismo, Licenciado Julio Almonte i Komandante di Base Area, Cesar Santana, mientras ku na kapital Santo Domingo e delegashon a reuní ku e Hefe di Gabinete di e Ministerio di Turismo Sr. Pablo Espinal i e direktor general di CESTUR Sr. Juan Rubicou.

Resultado konkreto di e kombersashonnan ta ku e akuerdo di koperashon aktual entre Politur i CESTUR a keda fortifiká i además a keda akordá ku un delegashon di CESTUR ta bishita Kòrsou na fin di luna di Oktober pa duna presentashon riba e forma eksitoso kon Repúblika Dominikana ta ehekutá nan projekto di seguridat turístiko atraves di CESTUR ku koperashon di e varios Ministerionan i ku apoyo di sektor privá. 

E kombinashon di foto athuntu ta duna un bista di e bishita di Politur na Repúblika Dominikana.

 

Humphrey W. Josefa MBA

Presidente Politur