Dekorashon di sentro di suidat, Punda i Otrobanda, barionan i puntonan stratégiko ta un nesesidat. MUCHU POLÍTIKONAN KU HORIZONTE KÒRTIKU.

Dekorashon di sentro di suidat, Punda i Otrobanda, barionan i puntonan stratégiko ta un nesesidat.

MUCHU POLÍTIKONAN KU HORIZONTE KÒRTIKU.

Siendo Kòrsou ta e promé pueblo den region di Karibe ku a kuminsá eksitosamente ku dekorashon di nos sentro di suidat, Punda i Otrobanda, kayanan prinsipal i sitionan stratégiko den temporada di fin di aña, pero den poko tempu e aktividatnan aki tur a muri por kompletamente i a disparsé pa falta di vishon i pèrseveransia. Fresku mester ta den nos tur su memoria ainda kon rondó di aña 1992, Pasku, Fiesta di lus tabata keda organisá pa Aqualectra huntu ku emisora Z’86, prinsipalmente kon e bario Santa Catharina, Julianadorp ku su pesebre, Suffisantweg, Santa Rosaweg den serkania di Kooyman, sierto partinan riba Schottegatweg tabata lusi inmensamente atraktivo i tabata hasi un impakto positivamente i grandi den nos pueblo. Despues a sosodé ku pa un periodo kòrtiku gobièrnu i Aqualectra huntu ku algun komersiante tabata sòru pa dekorashon di Punda i Otrobanda. Tabatin lusnan bunita den Punda i Otrobanda, por ehèmpel den Breedestraat, rondó di Waaigat etcetera. En realidat e susesonan impreshonante aki tabata yuda Kòrsou di e siguiente formanan, pa kuminsá e tabata lanta e animo en general i e sentido di orguyo ku konfiansa den pueblo, anto ademas e tabata inspirá den ekspreshon artístiko. 

Kòrsou lamentablemente ku binida di sierto estilo di polítiko, gobernante i komersiantenan bashí na kurason i riba nan alma, pero manera falki pa hasi ganashi brutu, a kibra tur kreatividat den Kòrsou den un tempu rèkòrt. Dekorashon di Kòrsou a pasa pa historia! E plataforma kaminda ta tuma desishon a kai na Kòrsou riba práktikamente tur tereno, maske bon studiá, gobernantenan no ta suidadanonan inteligente, pasobra nan ta pone plaka sentral, sin ta uza nan serebro, no ta wak mas aleu, e ‘spinoff-effect’. Awendia ta wak solamente plaka na promé lugá pa hasi ganashi brutu, no ta wak kalidat, no ta wak servisio, no ta importá mañan i sigur no ta wak mas aleu. Ta normal pa nos tin polítikonan artifisial i sin ningun klase di vishon den polítika, no den gobièrnu i tampoko den parlamento. Polítikonan bobo, emoshonal i ònbeskòp ta kere ku ta nan ta e kos. Anto esnan sabí i studiá ta zueif den laira, ounke no ta presta ningun dònder, ta kana totalmente banda di nan sapatu. Rumannan, Kòrsou a dònder abou den otro i nos tur ta sintié tur santu dia di e forma ku nos riba tur tereno ta bayendo ku pasonan gigantesko patras. Netamente e tipo di mentalidat ei a hasi ku Punda i Otrobanda a muri por kompletu i nada no ta dunando resultado. Polítiko i gobernantenan bobo i ignorante ta bin pretendé ku no por dekorá sentro di suidat pasobra no tin plaka, pèrdiendo for di bista ku lagando e pueblo aki pasa Pasku i Aña Nobo den un Kòrsou totalmente sukú, ta den mas depreshon e kolektividat aki ta kai. Si ta trata di éksito di yunan di Kòrsou anto mester busk’é den seno di muchanan di Little League, peloteronan di grandes liga na Merka i futbolistanan yu di Kòrsou den eksterior (na Europa). Hopi aña nos a lucha ku programa Bario pa Bario pa yama atenshon pa ekonomia kreativo, ekonomia oraño òf kon ku yam’é. E polítiko i of gobernante bubè ku nos tin awendia, papiando di EKONOMIA oraño ta kla pa claim ekonomia oraño komo su teritorio. Pero en realidat ekonomia oraño i of ekonomia kreativo ta relashoná ku dekorashon di Punda i Otrobanda, barionan i puntonan stratégiko. Nan ta keda nèchi i atraktivo dekorá manera awendia ta sosodé na Medellín, na Madeira, pasobra aya sí a komprondé ku eiden tin bida i ta un bon performance pa e suidat. Aki na Kòrsou, lamentablemente nos tin di haber ku polítiko i gobernantenan ku horizonte kòrtiku ku no ta inspirá ni nan mes te pa influensiá otronan. Enfin dekorashon di sentro di suidat  ta duna konfiansa, animo i ta lanta sentido di orguyo den pueblo. No ta ningun kuestion di plaka, sino VISHON i kalidat di gobernante. Ta Kòrsou a kuminsá ku dekorashon di sentro di suidat, pero nos a lag’é muri i awe otronan a tuma over. Pero, djis insentivá e aktividatnan aki e dekorashon aki por rebibá i hasi Kòrsou bolbe lusi atraktivo i interesante.