Parlamentario Curtley Obispo: karta dirigi na Minister di Finansa, señor Kenneth Gijsbertha, ku tópiko: status di kuentanan anual pendiente te ku aña 2017 di fundashonnan di Pais Kòrsou ku ta kai bou di portafolio di Minister di Finansa .
Minister di Finansa
Señor Kenneth Gijsbertha
Pietermaai #17/Pietermaai 4-4A
Presente
Djabièrnè, 18 òktober 2019
Tópiko: status di kuentanan anual pendiente te ku aña 2017 di fundashonnan di Pais Kòrsou ku ta kai bou di portafolio di Minister di Finansa.
Apresiabel Minister señor Kenneth Gijsbertha,
Duna kuenta i rason na tempu ta konta tambe pa fundashonnan ku ta entidatnan di Pais Kòrsou. Fundashonnan ku ta entidatnan di Pais Kòrsou, ku segun nan statutonan i e lei di Corporate Governance, mester kumpli i entrega tur aña na tempu nan kuenta anual auditá (“gecontroleerde jaarrekening”) i tambe raporta riba funshonamentu di “Corporate Governance”.Den e Rapòrt di Maneho Finansiero di Pais Kòrsou di Yüni 2019 (FMR Yüni 2019), anekso (“bijlage”) 4 , mi a tuma nota ku te ainda tin diferente fundashonnan ku ta entidatnan di Pais Kòrsou i ku ta kai bou di portafolio di Minister di Finansa, ku te ainda tin kuentanan anual pendiente pa entrega te ku aña 2017 na Gobièrnu di Kòrsou.
A base di: (1) Rapòrt di Maneho Finansiero di Pais Kòrsou di Yüni 2019 (FMR Yüni 2019), anekso (“bijlage”) 4 i (2) kumplimentu ku e lei di Corporate Governance i tambe, mi ta aserka Minister di Tráfiko, Transporte i Planifikashon Urbano ku e siguiente preguntanan. Preguntanan, hasiendo uso di mi derecho komo parlamentario pa hasi pregunta konforme artíkulo 57 di Areglo di Estado di Kòrsou (nos lei máksimo) i tambe artíkulo 96 di Reglamentu di Orden di Parlamento di Kòrsou:
Stichting Gaming Control Board:
- Kua ta e motibunan konkreto ku Stichting Gaming Control Board segun e FMR Yüni 2019 bijlage 4, te ainda no a entrega su kuentanan anual auditá di añanan 2011 te ku 2017 na Gobièrnu di Kòrsou ?
- Ki dia Parlamento di Kòrsou lo risibí di Gobièrnu di Kòrsou e kuenta anual audita di añanan 2011 te ku 2017 di Stichting Gaming Control Board?
Fundashon Wega di Number Kòrsou:
- Kua ta e motibunan konkreto ku Fundashon Wega di Number Kòrsou segun e FMR Yüni 2019 bijlage 4, te ainda no a entrega su kuenta anual auditá di aña 2017 na Gobièrnu di Kòrsou ?
- Ki dia Parlamento di Kòrsou lo risibí di Gobièrnu di Kòrsou e kuenta anual audita di aña 2017 di Fundashon Wega di Number Kòrsou?
Atentamente,
Curtley Obispo
Parlamentario pa Kòrsou
PAR
