Den presupuesto pa aña 2020, Ministerio di SOAW ta bai konosé un oumento di 23 mion florin kompará ku presupuesto di aña 2019, nos ta puntra nos mes ku ta di bèrdat Kòrsou ta pasando den un situashon finansiero prekario

Den presupuesto pa aña 2020, Ministerio di SOAW ta bai konosé un oumento di 23 mion florin kompará ku presupuesto di aña 2019, nos ta puntra nos mes ku ta di bèrdat Kòrsou ta pasando den un situashon finansiero prekario

 

Frakshon di Movementu Futuro Kòrsou (MFK) a keda asombrá, ku den presupuesto pa aña 2020 e ministerio di SOAW ta bai konosé un oumento di 35 mion florin. Frakshon di MFK ta konsiente i ta di akuerdo ku mester kombatí pobresa i halsa kalidat di bida di esnan ménos pudiente den nos komunidat. Pero ora frakshon di MFK a analisá e presupuesto nos a keda asombrá ku un di e subida nan ta riba e “Functie 170100” Minister di SOAW, na 2019 tabatin un montante di 498.581 mil florin presupuestá i pa aña 2020 esaki ta bira 1.138.500 florin. Esaki ta un oumento di 300%, ta dikon e pòst ku ta unu ku ta toke e Minister ta konosé e oumento drástiko aki.

 

Frakshon di MFK tin ku remarká ku tur e Ministernan di gabinete Rhuggenaath a oumentá e presupuesto ku ta regardá nan persona, nos no por yega na otro konklushon ku mirando ku elekshon ta na kuminsamentu di aña 2021 ku e oumento aki ta pa e Ministernan kuminsá hasi kampaña elektoral pa nan mes for di fondonan públiko. Miéntras ku pueblo di Kòrsou ta sufri ku medidanan ku ta kòrta den nan forsa di kompra.

 

Nos a tuma nota den e presupuesto di SOAW ku a kòrta den e presupuesto di kasnan i fundashonnan ku ta kuida nos grandinan. Ta kòrta ku 2.7 mion florin pa kuida nos hende grandinan, di e forma aki gabinete Rhuggenaath ta mustra ku pa nan nos adultonan mayor, no meresé un trato digno i humano pa tur e añanan ku nan a yuda konstruí nos dushi Kòrsou.

 

“Functie 176301  Jeugdzorg”, esaki ta un pòst kaminda lo mester tin kuido pa nos hóbennan ku a haña nan mes den problema ku kriminalidat of pa ku pa motibu sosial gobiernu mester enkarga di nan. E pòst aki e Minister di SOAW ta kòrta ku 3.1 mion florin pa kuido hubenil. Nos ta puntra nos mes dikon, ta mas hóben den e sirkuito kriminal i/of negativo gabinete Rhuggenaath kier mira den nos komunidat? Hóbennan no tin derechi di konta ku un aporte digno di e gobièrnu di Kòrsou? 

 

“Functie 176105 UO Bureau Mediation”, e pòst aki ta regardá mediashon pa e kantidat grandi di yunan di tera ku a pèrdè trabou bou di gobernashon di gabinete Rhuggenaath. Den e aña aki kaba nos a tuma nota kon e Minister konserní ta duna un fundashon ku yama “Ku kara pa porta di Trabou” un kantidat di sèn pa hasi trabou ku ámtenarnan den e ministerio mes por ehekutá.

E pòst aki na 2019 tabatin un suma di 81.400 mil florin presupuestá i pa aña 2020 esaki lo bira 3.608.000 mion florin. Ku otro palabra e Minister ta bai kontinuá ku e fiesta ku a kuminsá kuné pa e fundashon menshoná.

 

Di bèrdat e oumento drástiko aki ta sorprendé frakshon di MFK i nos ta spera ku Minister Koeiman por realisá ku e tarea primordial di ministerio di SOAW ta atendé e parti sosial, laboral i halsa kalidat di bida di siudadanonan den nesesidat den nos komunidat. Ta tristu pa mira ku e Minister a skohe pa oumentá e pòst ku ta regardá su mes persona ku mas di mei mion florin.

 

Tristu Minister Koeiman

 

Jacinta Constancia

Miembro di Parlamento

Pa frakshon di MFK

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: