Ouditoria di kalidat i medioambiente a finalisá positivo pa Selikor

Ouditoria di kalidat i medioambiente a finalisá positivo pa Selikor

 

 

E kompania di ouditoria hulandes BSI a ouditá Selikor NV riba su maneho di kalidat i medioambiente segun e último normanan ISO 9000-2015 i 14001-2015 i Selikor a pasa e kòntròl akí di forma eksitoso. Esaki ta nifiká ku Selikor NV lo risibí un bes mas e sertifikado di ISO di kalidat i lo mantené e aktual sertifikado di ISO di medioambiente.

 

Durante e siman di 21 pa 25 di òktober e ouditor di e kompania BSI, sr. Barry Borst, tabata di bishita na Selikor NV pa husga tantu e sistema di kalidat komo esun di medioambiente. Borst a ouditá diferente proseso i prosedura den diferente departamentunan di e kompania i tabatin palabranan di elogio pa e forma kon, apesar di e retonan finansiero, Selikor a sa di sigui duna atenshon na kalidat di servisio i kuido di nos medioambiente. Manera e sistema di ISO ta preskribí Borst a duna tambe algun sugerensia pa mehorashon den kuadro di primordialmente redukshon di gastu.

 

Ku e sertifikashon di ISO, Selikor por demostrá ku e kompania tin su normanan di prestashonnan bon definí, ta plania, ehekutá, kontrolá, midi resultado di su propio prestashon i kaminda esaki ta nesesario ta adaptá i koregí. Borst di e kompania di ouditoria BSI a manda palabranan di elogio pa e personal tambe di Selikor pa nan forma transparente i aksesibel di hiba e entrevistanan durante di e ouditoria.

 

Gerensia i personal di Selikor ta kontentu ku e logro akí i ta komprometé pa sigui traha di forma konsistente pa kumpli ku eksigensianan di ISO 9000 i ISO 14001. Un danki ta bai na komunidat den su totalidat pa e sosten i konfiansa brindá na Selikor durante aña 2019.