Maduro & Curiel’s Bank ta entregá MCB Prize 2019 na Curaçao Airport Partners

Maduro & Curiel’s Bank ta entregá MCB Prize 2019 na Curaçao Airport Partners

Willemstad –  Maduro & Curiel’s Bank for di 23 aña pasá a introdusí un prestigioso rekonosementu na fin di aña; e asina yamá MCB Prize. Esaki ta parti di nos kompromiso pa sigui yuda desaroyá i sostené nos Dushi Kòrsou i alabes krea un relashon sosial ku nos komunidat. E premio aki ta rekonosé un persona, evento, organisashon òf kompania ku na nos humilde opinion a sobresalí i/òf a hasi mas impakto positivo den nos komunidat durante e aña ku ta kabando aki. 

E aña aki pa di 23 aña konsekutivo, Maduro & Curiel’s Bank ta otorgá e premio aki. E aña aki MCB a skohe un organisashon ku resientemente a keda selektá komo e di 7 mihó den e region kompletu di Sentro Amérika i Karibe. Nos ta referí aki na e prestigioso operador di nos aeropuerto, Curaçao Airport Partners. 

Manera m’a kaba di menshoná, e di 7 aeropuerto no solamente mas mihó, pero tambe di mas bunita den nos region. Ta sumamente importante pa nos realisá ku nos èrpòrt ta e motor pa kresementu di nos turismo, pero tambe pa fasilitá nos tur ku ta biaha, buska òf hiba kualke pasahero. Nos èrpòrt ta esensial pa nos ekonomia, pa nos isla i pa nos por konektá ku henter mundu.

Na aña 2003 Curaçao Airport Partners, un konsorsio di invershonistanan internashonal privá, ku ta konsistí di Aport (aeropuerto di Zurich), Janssen de Jong (Hulanda) i CCR (Brazil) a firma un akuerdo di koperashon ku Gobièrnu di Kòrsou; e asina yamá DOMA (Development, Operation and Maintenance Agreement). Un akuerdo den kual nan ta responsabel pa desaroyo, finansiamentu i operashon di aeropuerto internashonal di Kòrsou.  

For di aña 2014 aeropuerto di Kòrsou a bin ta risibí alrededor di 1.8 mion pasahero. Mirando e kresementu aki, Curaçao Airport Partners a inisiá e planifikashon i diseño di e ekpanshon di e terminal di aeropuerto pa akapará un kantidat proyektá na no menos ku 2.5 mion pasahero. 

Privatisashon di e operashon di èrpòrt a resultá den efisiensia optimal tantu di maneho komo finansieramente, mientras a logra i asta surpasá e modelo internashonal pa operá i manehá un èrpòrt. 

Na aña 2016 Curaçao Airport Partners a hasi un finansiamentu di un montante signifikante pa ehekutá ekspanshon di e terminal di e tempu ei. Nos ta kontentu ku for di inisio, na aña 2013 nos a hinka nos konfiansa den e organisashon aki.

Na komienso di e aña aki, Curaçao Airport Partners a inougurá su terminalnan bunita i impreshonante i a logra posishoná aeropuerto di Kòrsou komo unu kompetitivo den area di Karibe. Manera menshoná anteriormente 

CAP a gana e prestigioso premio “SkyTrax World Airport Awards 2019”,  komo e di 7 mihó airopuerto den Sentro Amérika i Karibe. 

Komo un pilar importante den nos industria di turismo, Curaçao Airport Partners ta duna di su parti tambe na e importansia di responsabilidat sosial; dor di sostené kousanan noble manera Fundashon Sinta Ros i dor di hasi trabounan boluntario pa entre otro Stichting EHBO. 

Maduro & Curiel’s Bank a kere den CAP i ta orguyoso ku huntu ku algun otro invershonista por tabata parti di e proyekto pa desaroyá nos aeropuerto. Un proyekto ku a engrandesé nos turismo na Kòrsou pero tambe kontribuí na desaroyo positivo di nos ekonomia lokal.

P’esei nos ta sumamente orguyoso di por entregá MCB Prize 2019 na Curaçao Airport Partners.

Masha Masha Pabien i Danki pa kere den nos Dushi Kòrsou!

 

15 di desèmber 2019

This site uses Akismet to reduce spam. Learn how your comment data is processed.

error: Content is protected !!
%d bloggers like this: