Hasi petishon pa bo pèrmit pa por bende kos riba ruta(nan) di karnaval 2020

Hasi petishon pa bo pèrmit pa por bende kos riba ruta(nan) di karnaval 2020

Geplaatst op 08 January 2020 dor di Ministerio Desaroyo Ekonómiko

WILLEMSTAD- Ministerio di Desaroyo Ekonómiko kier rekordá tur persona ku kier bende produkto riba un òf ámbos ruta di karnaval 2020 (Bándariba i/òf Bándabou) ku mester dispone di un pèrmit temporal bálido pa por hasi esaki.

Personanan ku ta kumpli ku tur e rekisitonan preskribí i ku kier bende algu riba ruta(nan) di karnaval 2020 ya por hasi petishon pa un pèrmit temporal. Si akaso bo ta deseá di bende kos di forma ambulante bo mester hasi petishon pa un ‘ventvergunning’ temporal i si akaso lo bo ke bende kos for di un puesto fiho lo bo mester di un ‘standplaatsvergunning’ temporal.
Pa por entregá un petishon sea pa un vent- òf un standplaatsvergunning temporal, mester tin tur e siguiente rekisitonan na òrdu;

  • tur doño di pèrmit mester trese un identifikashon bálido di su mes i di kada asistente ku lo laborá huntu kuné,
  • si akaso e petishonario òf unu di su asistentenan ta estranhero mester presentá tambe kopia di un pèrmit di estadia òf kopia di e petishon pa un pèrmit nobo,
  • huntu ku esakinan mester trese tambe un sertifikado di salú di e bendedó, (tur asistente tambe mester tin nan karchi di kùr di G&Gz (ántes GGD) durante e evento),
  • komprobante di pago pa e pèrmit,
  • komprobante di pago di prekario (solamente pa un pèrmit temporal di standplaats),
  • kopia di reibeweis, karchi di kùr, resibu di seguro i papel di number di outo (solamente pa un pèrmit temporal di vent).

 

photocredit: Curacao.com

Na momentu di entrega di e pèrmit ta pidi tambe un stampia na balor di     Fls. 10,- pa e ventvergunning i Fls. 20,- pa e standplaatsvergunning. Pa por hasi petishon pa ámbos pèrmit (vent- òf standplaatsvergunning temporal) pa temporada di karnaval 2020 mester akudí durante oranan di ofisina na Lokèt di Pèrmit na Saliña 127 pegá ku Subway.

Tur persona ku mester hasi petishon pa prekario lo mester akudí na ofisina di ROP na Plasa Horacio Hoyer 19 durante oranan di ofisina pa por hasi esaki.

Último fecha pa entrega di petishon tantu pa un di e pèrmitnan temporal komo pa prekario lo ta djabièrnè 24 di yanüari próksimo.

Tuma nota ku personanan ku ya ta bende kos riba e ruta di karnaval lo mester hasi petishon tòg pa por risibí un pèrmit spesífiko pa karnaval 2020.

Pa mas informashon tokante e pèrmitnan temporal di standplaats i vent, un i tur lo por tuma kontakto libremente ku Lokèt di Pèrmit na tèl. 433-3123 òf 0800-1515.

Pa informashon tokante Prekario por tuma kontakto ku koleganan di ROP na tèl. 462-2014 òf 462- 4015

This site uses Akismet to reduce spam. Learn how your comment data is processed.

error: Content is protected !!
%d bloggers like this: