Gana un espasio pa bo empresa den e zona empresarial di Sambil; MEO ta sostené lansamentu di e kompetensia #SambilPaKòrsou

Gana un espasio pa bo empresa den e zona empresarial di Sambil; MEO ta sostené lansamentu di e kompetensia #SambilPaKòrsou

Geplaatst op 10 January 2020 dor di Ministerio Desaroyo Ekonómiko

WILLEMSTAD- Djárason 8 di yanüari último Minister di Desaroyo Ekonómiko, Sra. Giselle Mc William tabatin e honor di por tabata presente durante lansamentu di un kompetensia pa krea un movementu empresarial, #SambilPaKòrsou’. Un kompetensia enfoká na enkurashá i habri oportunidatnan úniko pa empresarionan lokal den sektor di empresanan chikí i mediano.

Un di e metanan prinsipal di Ministerio di Desaroyo Ekonómiko (MEO) ta, pa kontribuí na establesimentu di mas empresa chikí i mediano stabil i duradero na Kòrsou. Empresanan ku por inová, krea fundeshinan sólido i proveé pa kasnan di famia pero ku tambe un dia por krese i yega na eksportá i amplia su teritorionan.
No ta un sekreto, ku nos pueblo ta kargá ku hendenan talentoso i kapas i ku tur dia ta lanta i traha duru pa kristalisá nan soño di ta un empresario.
Netamente pa e motibu aki, tabata un honor i un plaser pa nos ministerio huntu ku minister Mc. William por a presensiá lansamentu di e kompetensia pa krea un movementu empresarial, #SambilPaKòrsou den e zona empresarial ku resientemente a keda inougurá den sentro komersial Sambil. Pa medio di e kompetensia aki, Sambil ta habri e oportunidat pa empresarionan lokal registrá via di nan wèpsait ku e chèns pa gana uso di un espasio den e zona empresarial aki liber di gastu pa un periodo stipulá. Úniko rekisito pa registrashon ta, ku bo empresa mester ta unu registrá den e registro di empresa na Kámara di Komersio.

Di tur e registrashon nan risibí, un kuerpo di hurado lo skohe 30 empresario ku inisialmente lo haña e oportunidat pa show nan produkto/servisio pa un temporada definí den Sambil su zona empresarial pa medio di un feria. Durante di e temporada aki públiko en general lo por vota online pa asina saka 6 (seis) empresario for di e 30 nan ku lo risibí nan propio espasio den e zona empresarial pa un periodo stipulá  huntu ku diferente training, coaching i hèrmèntnan pa yuda nan krese i amplia nan negoshi.

MEO sin mas ta aploudí i sostené e inisiativa #SambilpaKòrsou mirando ku esaki ta duna un kontribushon inovativo na e desaroyo ku nos lo ke mira den nos sektor empresarial. Aparte di esaki, MEO lo partisipá i tambe duna kontribushon na e inisiativa aki. Depaso nos ta invitá i enkurashá tur empresario ku lo ta interesá pa registrá,  pa bishita e página di Facebook di Sambil Kòrsou i sigui e link ku lo guia bo pa registrá bo empresa. E link aki lo keda kompartí tambe riba página di Facebook di Ministerio di Desaroyo Ekonómiko di moda ku esaki por fasilitá akseso pa mas tantu empresa posibel por registrá i partisipá na e oportunidat úniko aki.