TREMENDO KURSO PA ENTRENADÓNAN HUBENIL DI KÒRSOU, ARUBA, BONEIRU I SINT MAARTEN ORGANISÁ PA KNVB I CONCACAF!

TREMENDO KURSO PA ENTRENADÓNAN HUBENIL DI KÒRSOU, ARUBA, BONEIRU I SINT MAARTEN ORGANISÁ PA KNVB I CONCACAF!

 

 

Den wikènt tras di lomba a tuma lugá e klousura di e UEFA Assist Course organisá pa KNVB i CONCACAF. E aliansa di KNVB ku CONCACAF aki ta netamente pa e desaroyo di edukashon, kapasidat i liderasgo serka nos entrenadónan hubenil.

E kurso aki tabata pa entrenadónan di selekshonnan hubenil ku a konta ku representashon di Boneiru, Aruba, Sint Maarten i naturalmente Kòrsou. Meta di e kurso aki tabata pa engrandesé e konosementu di e entrenadónan hubenil di nos selekshonnan nashonal i preparánan ku e instrumèntnan adekuá pa nan por guia, instruí i prepará nos selekshonnan pa kompetensianan riba nivel regional i internashonal.

E kurso aki a tuma lugá di 18 pa 25 di yanüari na FFK den Sala Richard Th. Curiel i e tabata na enkargo di Piet de Jong, Bert Zuurman, Johan Neeskens ku Etienne Siliee.

Un total di 28 entrenadó hubenil a partisipá hinter e siman ei for di mainta trempan te den oranan di anochi. E kurso tabata konsistí di un parti teorétiko pero tambe un parti práktiko kaminda diferente ekipo hubenil a yuda den e parti aki. Tambe e kursistanan a haña diferente ‘workshop’ i mester a hasi algun presentashon di tareanan ku nan a ehersé durante e kurso.

Despues di un siman yená ku diferente informashon balioso, tur e kursistanan a risibí nan sertifikado di partisipashon ku a konta ku presensia di presidente di FFK, Sr. Shaheen Elhage i tambe Johan van Geijn ku ta esun enkargá pa organisá e tipo di kursonan aki pa KNVB den Karibe.

Awor Boneiru, Aruba, Sint Maarten i Kòrsou ta konta ku entrenadónan hubenil ku mas eksperiensia, ideanan nobo i inovativo, ku ta kla pa sigui traha pa nan pais i ku nos hóben futbolistanan ku ta e futuro di nos futbòl.

 

FFK ta yama pabien na tur e entrenadónan aki i ta deseánan éksito pa den futuro!