Barku di Spaña Juan Sebastian de Elcano ta bishitá Korsou

Barku di Spaña Juan Sebastian de Elcano ta bishitá Korsou

 

Dia 22 di febrüari proximo haf di Korsou lo habri brug pa jama bon bini na e buque escuela “Juan Sebastián de Elcano” na nos dushi pais. Curaçao Sail Foundation ku Sra Lucky Ezechiëls komo presidente i su team, ta sumamente kontentu i honrá ku yegada di e buque escuela aki di Spaña.

No ta promé biaha ku “Juan Sebastián de Elcano” ta bishitá Korsou. Pero for di su promé bishita na 2006, e barku aki ta un sensashon pa su bunitesa, grandesa i pa su tripulashon asina amabel, kortés i disipliná.

E velero aki tin 4 mast i e tin 113 meter di largura.
E barku a ser konstruí na Cádiz, Spaña na aña 1927 i na e mesun aña e la kuminsa nabegá. E ta e di 4 barku di 4 mast mas grandi na mundo; e ta kasi mes grandi ku su gemelo “Esmeralda” (number 3) ku tabata aki durante Velas Latinoamérica Curaçao 2018.

E barku a ser nombrá pa Juan Sebastián de Elcano ku tabatá un Spañó di orígen Vasco ku entre 1519 i 1522 a sali buska speserei huntu ku Fernando Magallanes, i ku a komplementá e prome circunnabegashon di mundo. (Magallanes a muri na kaminda i Elcano a tuma e batuta). Pues ta un barku ku un istoria hopi largu i además un trayektoria di 92 aña; hopi interesante pa nos hobennan konosé.

 

Tripulantenan den Karnaval.

Mirando e fecha ku e barku ta yega Korsou ku ta 22 di febrüari, bispu di nos Gran Marcha di Karnaval 50 aña, Sra Lucky Ezechiëls a drenta den kontakto ku Fundashon JAG; grandi ta nos sorpresa ku 150 miembro di e tripulashon di e barku “Juan Sebastián de Elcano” ta partisipá den nos Gran Marcha. E grupo lo ta bistí na blanku ku lensu korá, simbolisando e fiesta grandi di San Fermín (korementu ku toro, na Pamplona na nort di Spaña ku ta atrae tur aña masha hopi turista); nan mes ta toka i balia i nan lo trese nan “toro” nan tambe. Esaki sigur lo engrandesé nos marchanan aun mas tantu den e selebrashon di 50 aña di nos karnaval.

 

Manera semper lo tin oportunidat pa bishita e barku.
E barku ta habri djadumingo 23, djaluna 24 i djamars 25 di febrüari di 10or di mainta pa 1or di merdia i di 4or di atardi pa 7or anochi. Sigur un oportunidat pa esnan ku ta para den area di Otrobanda, pa por pasa bishita e barku mará na Matheywerf, mientras nan ta warda nos Gran Marcha riba djadumingo i Marcha di despedida riba djamars. Manera nos a menshona ariba kaba, ta bale la pena pa nos hobenan subi e barku i asina sera konosi ku un otro kultura ku ta kompletamente diferente for di esun di nos. Esei lo ta un interkambio interesante!

Curaçao Sail Foundation ta sintiéle hopi honrá pa por risibi un biaha mas na Korsou e bunita velero aki ku ta “Juan Sebastián de Elcano”.

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: