Na tur saserdote, diákono, religioso i laikonan di Obispado di Willemstad. “Seis isla uní den Kristu”

II Mensahe di Obispado di Willemstad

14 mart 2020
Na tur saserdote, diákono, religioso i laikonan di Obispado di Willemstad.
“Seis isla uní den Kristu”
Apresiabel rumannan,
Risibí mi saludo di pas i union den e di tres djadumingu di Kuaresma ku ta invitá nos pa abri nos oido i kurason na Dios su Palabra i drenta den un diálogo profundo ku Hesus, manera El a hasi ku e hende muhé samaritano, ora kansá di su biahe El a kai sinta na e pos i a pidié awa pa bebe (Huan 4,5-42). Hesus ke duna nos tambe e awa bibu ku ta laba nos pikánan i ta renobá nos humanidat!
Mi ta manda e di dos Mensahe di Obispado, despues di a tende i tuma nota riba loke nos outoridatnan lokal i Organisashon Mundial di Salú a informá dia tras dia tokante COVID-19, e Corona Virus i mi ta pidi boso tur pa tene kuenta ku lo siguiente:
1. Sigui e normanan ku outoridatnan lokal ta emití periodikamente den medionan di komunikashon (Radio, TV, rueda di prensa, korantnan).
2. Bolbe rekordá i praktiká sin falta e reglanan ku Obispado a publiká kaba dia promé di mart, na ora di drenta misa i selebrá Santa Eukaristia.
3. Na un manera partikular mi ta pidi pa hasi uso di disernimentu pa tuma medidanan preventivo i responsabel pa tur persona ku ta pasando algun kebranto di salú, ku tin síntoma di griep of tosamentu. Sea asina bon di keda na kas i kumpli ku boso deber religioso siguiendo Santa Eukaristia via TV, FB of Radio. Esaki ta konta tambe ta nos rumannan ansiano. Tambe mi ke korda boso pa kuida boso salú. Esaki no solamente pa e evitá e Corona Virus pero mas bien pa boso salú en general.
4. Komo boso obispu- wardadó, mi ta sigurá boso di keda den kontakto ku
Gobiernu lokal di kada isla, igualmente ku tur pastor di parokia. Nos tin e konfiansa ku tur huntu,  siguiendo fielmente e direktivanan, nos por reakshoná na un manera adekuá riba e situashon delikado aki. Si ta bira nesesario pa bini ku medidanan adishonal na bienestar di un i tur, direktamente nos lo informá boso.
5. Mi rumannan, den tur situashon di bida pa difísil ku e por ta, Dios ta semper ku nos. Pesei laga nos probechá di e tempu aki di Kuaresma pa skucha su Palabra, pa resa ku mas ferbor, yuda nos próhimo den nesesidat i hasi obranan di miserikordia. Ku Spiritu Santu sigui kompañá nos Gobiernu i tur esnan ku ta dediká nan talento, manera dokter, enfermero, boluntarionan, enkargá  ku e responsabilidat pa kontené e virus aki na un manera mas efektivo posibel.
6. Mi ta invitá boso pa resa den boso kas di famia tur dia e orashon ku papa Francisco a prepará pa superá e momentu difisil aki di nos humanidat.
Mama Maria, salú di enfermonan, pidi pa nos!
Boso sirbidó den Hesus i Maria,
+ Luis A. Secco, SDB
Obispo di Willemstad
ORASHON di papa Francisco
na SANTISIMA BIRGEN MARIA, MAMA DI AMOR DIVINO
(kontra pandemia di CoronaVirus)
Oh, Maria,
abo ku semper ta resplandesé den nos kaminda
komo signo di salbashon i speransa.
Abo ku ta salút di enfermonan,
abo kende na pia di e Krus di Hesus,
a uni ku su dolor, i a mantené bo Fe:
nos ta konfia den bo.
Abo, kende ta intersedé pa salbashon di tur pueblo;
Bo sa di nos nesesidat
i nos tin e siguransa ku bo ta pidi pa nos,
meskos ku na Kana di Galilea,
pa nos por haña bek nos legria i goso,
despues di e momentu di prueba aki.
Yuda nos, Mama di Amor Divino,
pa nos ta konforme ku boluntat di Tata,
i pa nos hasi loke Hesus bisa nos.
E ku a tuma riba su skouder
tur nos sufrimentu i dolornan
pa medio di su Krus,
i asina hiba nos na legria di su Resurekshon.
Amen.

Nos Tata, Ave Maria i Gloria (3x)

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: