Medidanan ku Kuerpo Polisial a kuminsá tuma relashoná ku vírus di Corona.

KOMUNIKADO DI PRENSA 113/ 2020
17 mart 2020
Medidanan ku Kuerpo Polisial a kuminsá tuma relashoná ku vírus di Corona.
Departamentu di Komunikashon i Prevenshon
KUERPO POLISIAL KÒRSOU SIRBI I PROTEHÁ
Relashoná ku presensia di e vírus di Corona riba nos isla i pa garantisá mas tantu
posibel ku trahadónan di Kuerpo Polisial no ta keda infektá ku e vírus aki, ta
nesesario pa tuma algun medida pa un tempu indefiní.
 Trahadónan di Kuerpo Polisial ta obligá pa sigui tur instrukshonnan en
konekshon ku medidanan di higiena konforme protokòlnan i
prosedimentunan interno i di gobièrnu.
 No ta permití ningun siudadano den warda di polis ku tin síntomanan manera
tosamentu seku, problema respiratorio of kentura. Den kasonan di
emergensia yama 911 òf si no ta urgente, e number 917. Pone nos na altura
di e situashon pa asina ei huntu ku bo nos wak den ki forma e servisio por
wòrdu duna mas responsabel posibel. Kòrda yama bo dòkter!
 Callcenter di polis (917) lo evaluá kada kaso minusiosamente pa asina ei pone
prioridat na e kasonan ku meresé mas atenshon i ku no por wòrdu suspendé
ni atendé via telefòn.
 Entrante djárason 18 di mart 2020, mester traha sita pa hasi denunsia. Esaki
ta pa evitá ku den nos salanan di espera tin muchu hende.
Denunsianan por wòrdu hasi por lo pronto únikamente na wardanan di polis
Montana, Rio Canario i Barber.
Pa traha sita por yama:
Warda di Polis Montana na 8666700
Warda di Polis Rio Canario na 8666800/8666801
Warda di polis Barber na 8666900
Nos ke animá tur esnan ku por pone nan denunsia riba papel, pa hasi esaki i
mail e denunsia pa nos i nos lo prosesá esaki. Na momentu ku e denunsia
prosesá ta kla, nos lo tuma kontakto bek ku bo, pa firma.
Importante ta pa bo pone den e mail ku bo ta manda ku e denunsia, bo
nòmber kompletu, adrès, number di telefòn i indikashon ku esaki ta un
denunsia.
E denunsiánan por wòrdu di mail na un di e tres wardanan ariba menshoná,
na e siguiente e-mail adrèsnan:
Warda di Polis Montana: warda.montana@polis.cw
Warda di Polis Rio Canario: warda.rio@polis.cw
Warda di Polis Barber: warda.barber@polis.cw
 Pa imigrashon na haf, tambe a tuma medida. E personal di Imigrashon lo no
subi barku mas, pero solamente e kapitan lo baha i bini serka e personal di
imigrashon pa hasi e parti di “inklaring”.
 Entrante djárason awor a para tambe tur obligashon di mèldu di
estranheronan na Imigrashon na Rio Canario te ku 31 di mart próksimo.
 Personanan ku ke drenta den kontakto ku e Departamento di Asuntunan
Interno di polis (BIZ), por traha un sita òf manda un mail na
UIZKPC@gmail.com. Tambe por yama e numbernan di telefòn 8666161,
8666163, 8666159 òf 5242446.
 Departamento di Tráfiko i Departamento di pèrmit lo atendé kasonan mas
tantu posibel via telefòn òf via mail.
Departamento di Tráfiko: 8666137/8666236. Email-adres: trafiko@polis.cw
Departamento di Pèrmit: 8666101/8666106. Email-adres: ubw@polis.cw
 Por lo pronto pa kuminsá 2 siman, lo no por tuma bròmer i skuternan
konfiská bek na warda di polis na Rio Canario.
 Si bo pidi asistensia polisial via Sentral di Polis i den bo serkania tin persona di
kua bo ta na altura ku síntomanan di e vírus, duna esei tambe di konosé na
Sentral, di manera ku e unidat delantá por tuma medidanan di prekoushon.
Pa trahadónan di Kuerpo Polisial ku mester sigui duna e servisio i mantené òrdu
públiko, tampoko ta fásil pa traha bou di e sirkunstansianan no kustumbrá aki.
P’esei nos ta konta ku koperashon di komunidat kompletu, pa huntu nos enfrentá e
reto aki i tòg finalmente sali mas mihó posibel for di dje.