Kòrsou ta bai di akuerdo ku kondishonnan di Hulanda mará na sosten finansiero, semper den kuadro di lei

Geplaatst op 20 May 2020 dor di Ministerio Asuntunan General i Promé Minister

WILLEMSTAD – Durante di un Konferensha di Prensa ekstraordinario ku a tuma lugá den oranan di mainta riba djárason 20 di mei 2020, Gobièrnu di Kòrsou a anunsiá ofisialmente ku Konseho di Minister a bai di akuerdo ku e proposishon di Hulanda pa ku e di 2 i di 3 transh di sosten finansiero i e kondishonnan mará na esaki. Sin embargo, lo kumpli k e kondishonnan aki di akuerdo ku lei.

E desishon aki a tuma lugá ku aporte di organisashon i gruponan di interes di vários sektor ku ta forma parti di nos komunidat, di e manera aki teniendo kuenta ku e nesesidatnan di un-i-tur i tambe e diferente aspektonan ku ta forma e realidat ku nos ta biba aden. Kuminsando djaluna proksimo, den e simannan benidero, promé ku e ‘deadline’ ku Hulanda a pone di 15 di yüli 2020, Gobièrnu lo tuma e pasonan nesesario pa yega na implementashon integral i struktural di e reformenan ku mester tuma lugá. Esaki no ta kita afó ku Gobièrnu di Kòrsou ta di opinion ku hopi di e kondishonnan no ta aportá na kresementu duradero di nos ekonomia pero mas bien lo resultá den mas reto sosial-ekonómiko pa pais, i pues ta lamentá e echo ku Hulanda no a kis pa mas diálogo entre e dos paisnan promé ku bin ku un proposishon riba mesa.

No opstante esaki, Gobièrnu di Kòrsou ta mas ku konsiente di e nesesidat grandi pa bin ku un transformashon struktural di e Finansa Públiko di Kòrsou i ta tumando e pasonan nesesario pa ku esaki, prinsipalmente for di e momentu ku a firma un Akuerdo di Kresementu na 2019. Gobièrnu di Hulanda por spera un aserkamentu serio di parti di Gobièrnu di Kòrsou riba e asuntu aki i ta keda mira un ròl importante pa Kolegio di Supervishon Finansiero Kòrsou (Cft) komo e entidat ku ta monitoriá i konsehá riba e totalidat aki. No opstante esaki, Gobièrnu di Kòrsou no ta di akuerdo ku e pensamentu di Hulanda pa duna Cft adishonalmente e ròl di supervishon riba maneho di e presupuesto gubernamental, i ta ekspresá esaki tambe den su reakshon na Gobièrnu di Hulanda

Huntu ku su respuesta (inkluso punto di bista) na Gobièrnu di Hulanda, Gobièrnu di Kòrsou a manda un bista general di su konsiderashonnan riba e kondishonnan ku Hulanda e proponé. Básikamente esaki ta enserá ku Kòrsou ta bai di akuerdo ku introdukshon di e asina yamá “Rhuggenaath-norm” i rebaho di salario di tantu mandatarionan komo ámtenar. Ademas lo bin ku e ahustenan nesesario den sektor finansiero inkluso esnan ku ta konserní Banko Sentral, sin embargo konsiente di e realidat ku ta trata aki di un banko komun i pues independiente den su tomo di desishon.

na tur momento lo apliká transparensia den e forma ku Gobièrnu ta duna informashon na Cft i tambe na komunidat. Di parti di komunidat Gobièrnu ta hasi un yamada pa union den nos komunidat i ta konta ku e sosten i koperashon nesesario pa huntu komo pais surpasá e retonan grandi ku Kòrsou tin su dilanti. Meskos ta spera di por sigui konta riba un kolaborashon fruktífero entre Kòrsou i Hulanda den kuadro di solidaridat den Reino.

 

Pa lesa e karta di reakshon di Gobièrnu di Kòrsou na Konseho di Minister di Reino,

 

ANEKSO