Bisiñanan ta pidi atenshon di outoridatnan konserní pa maltrato severo di 2 mucha menor di edat
Bisiñanan di bario Noord Zapateer ta pidi atenshon di outoridatnan konserní pa maltrato severo di dos mucha menor di edat.
Un mucha di 9 i un di 11 aña ta biba huntu ku nan mama den Noord Zapateer. Tristu ta ku nan propio mama ta maltratá nan severamente. Na varios okashon bisiñanan a yama polis i tambe instansianan konserní i lamentablemente niun persona a aserká pa duna yudansa. Durante ku e muchanan ta keda maltratá, bisiñanan a yama sentral di polis pa laga e agente na liña mes tende loke ku tabata pasando. E kontesta tabata pa e bisiña bai papia ku e mama. Niun agente polisial a akudí despues di a risibí e yamada. Pa motibu ku e mama ta sali kas bai laga e muchanan nan so i yega kas anochi lat òf su siguiente dia, e muchanan ta haña kuminda serka bisiñanan. Instansianan ku ta distribuí paketenan di kuminda a entregá paketenan ku kuminda i djus pa e muchanan, pero e muchanan no ta pèrmití pa kue nada for di e paketenan. E muchanan a konfia e bisiñanan e maltrato severo ku nan ta risibí serka nan mama. Na momentu ku koriente kaba na e kas, e bisiñanan ta yuda pa e muchanan no ta den skuridat. No ta pone hopi koriente pa evitá ku e mama ta bin sa ku bisiñanan ta na altura di e situashon. Bisiñanan ta hopi preokupá ku e situashon aki i ta urgi polis i instansianan konserní pa intervení mas pronto ku ta posibel pa evitá mas situashon di lamentá despues.
