INTEGRIDAT I E GARANTIA DI POR RESPONSABILISA TA KEDA PUNTO DI SALIDA DEN PROSESO PA HIBA KOMBERSASHON I YEGA NA AKUERDO KU KUALKE PARTIDO
INTEGRIDAT I E GARANTIA DI POR RESPONSABILISA TA KEDA PUNTO DI SALIDA DEN PROSESO PA HIBA KOMBERSASHON I YEGA NA AKUERDO KU KUALKE PARTIDO
Willemstad 1 di yuni 2020- Refineria di Kòrsou (RdK) ta bolbe suprayá ku den e proseso pa selektá, hiba negosashon i yega na un akuerdo ku un partido pa garantisá un futuro duradero di nos instalashonnan petrolero ku a sigui aña pasa, dos di e puntonan di salida mas importante tabata integridat i garantía ku por responsabilisá e interes indiká.
Den e último dianan por a tuma nota di ekspershonnan di algun partido ku a vosiferá nan potenshal i deseo di por operá e refineria. RdK sinembargo no por hasi mas ku simplemente tuma nota di esaki debí ku RdK tin un akuerdo será ku grupo Klesch den kua tin stipulá ku no por entretené e tipo di interesnan aki, tanten ku ta trahando pa konkretisá e dil.
Ta bon pa kòrda ku Gobièrnu di Kòrsou a duna RdK a mandato pa buska un partido kapás pa por garantisá un futuro duradero pa nos fasilidatnan petrolero. Tur partido serio, ku tabata interesá, por a partisipá na e destaho, ku aña pasa e Project Management Organization di RdK a realisá. Un parti importante di e proseso aki, tabata un proseso di skrutinahe intensivo kaminda partidonan mester a entregá pruebanan relevante ku ta mustra te kon lew di bèrdat nan ta poseé entre otro rekurso i konosementu pa por kumplí unabes nan keda skohé. Partidonan ku no por a kumplí ku e eksigenshanan aki a keda gradisí i informá mientras nan no por a sigui mas den e proseso.
RdK a tuma nota tambe ku tin partido ku no a logra den e proseso transparente ariba menshoná ku awor ta buskando akohido serka persona òf organisashon ku no tin e mandato di Gobièrnu. Defakto, ta trata aki di intento deliberá pa inisiá negosashon paralelo mionario sin base legal. Kualke intento òf aserkamentu ku ta pafo di e proseso delineá i realisá pa RdK, no por tin base pa prosperá i hasta por resultá den desenlase fèrfelu i no deseá ku den pasado ya nos a konose kaba den nos esfuerso pa buska un partido pa operá nos refineria.
