Lesamentu ta dushi riba Stul di Lesadó nobo

 

Willemstad – Djadumingu 5 di yüli a inougurá e Stul di Lesadó nobo di e sirkulo di lesadó i kontadó di storia di tur djadumingu atardi den Bright World Park.

E sirkulo di lesamentu a kuminsá na ougùstùs 2006 ku e vishon pa bini huntu lesa un kuenta òf konta un storia i asina ei stimulá lesamentu komo un hèrmènt pa sobreviví den mundu.

Durante di añanan tin espesialmente hopi mucha ku a benefisiá di esaki.

Inougurashon di e Stul di Lesadó nobo a nifiká ku den un dushi ambiente atrobe a para ketu na importansia di lesamentu i kon mihó hasié ku sintá riba un bunita stul.

Oradó di atardi invitá tabata Hubèrt Isenia di Curaçao Zoo kende a papia di desaroyo di hardinnan zoológiko durante di tempu i kon importante ta pa protehá nos bestianan endémiko menasá ku ekstenshon manera biná, blenchi i abeha.

Despues hende di diferente edat a lesa un kuenta deleitando esnan presente sintá di mes riba e Stul di Lesadó nobo.

E sirkulo di lesadó i kontadó ta tur djadumingu atardi di 4or pa mitar di 6 den Bright World Park i ta pa hende di 3 pa 103 aña.

Pa mas informashon por bishitá riba facebook Bright World Park òf por tuma kontakto na aboutfemaleleadership@gmail.com.

Riba e potrètnan por mira momentunan durante di inougurashon di e bunita Stul di Lesadó nobo den Bright World Park.