ESTABLECIMENTO Y CIUDADANONAN MESTER ATENE NA REGLANAN “Coopera cu nos. Cu bo comportacion nos lo vence e crisis aki di berdad”.

 

Prome Minister Evelyn Wever-Croes:

 

ESTABLECIMENTO Y CIUDADANONAN MESTER ATENE NA REGLANAN

“Coopera cu nos. Cu bo comportacion nos lo vence e crisis aki di berdad”.

 

Prome Minister Evelyn Wever-Croes, den conferencia di prensa di Gobierno di Aruba dialuna anochi, a enfatisa riba e comportacion di establecimentonan y ciudadanonan den e crisis aki bisando cu cooperacion di nos comportacion, nos lo vence e crisis aki di berdad.

 

Aruba a pasa mas di 10 caso activo desde apertura di nos fronteranan. Diamars a drenta informacion cu nos a yega na 14 caso activo. Den e casonan aki, tin local y turistanan cualnan tur a wordo isola. Prome Minister a indica cu e cifra aki no ta di preocupacion pa Gobierno cambia maneho y bin cu mas medida. Gobierno y Crisis Team a tene cuenta cu cifranan den planificacionnan y proyeccionnan pa habri fronteranan bek. Te ainda tur cos ta bayendo manera a premira.

 

Sinembaro, Prome Minister a duna di conoce, no ta e cifra aki ta preocupa Gobierno y Crisis Team. Pero ta e comportacion di algun ciudadano ta hopi preocupante. Fin di siman tawata tin aglomeracionnan na diferente establecimentonan na nos pais. Ta parce cu hopi hende no ta comprende e importancia cu mester tene distanciamento fisico di 1.5m for di otro ainda.

 

Si nos wak desaroyonan na otro paisnan, Miami por ehempel cu ta conoci pa su bida nocturno hopi activo, y otro paisnan, entre otro Spaña y Francia, cu ta habriendo nan economianan bek y ta habri pa turismo especialmente pa e bida nocturno, tin Toque de Queda na e paisnan aki. Otro paisnan ta cera anochi tempran tur establecimento cu ta bende alcohol. Otro paisnan ta pone multanan asina halto cu establecimentonan cu ta bende alcohol ta prefera di ni habri mes. Y tin paisnan cu ta kita subsidio di salario for e establecimentonan di entretenimento nocturno momento cu nan no cumpli cu e reglanan estableci.

 

Loke cu e paisnan aki tin en comun pa nan a tuma e medidanan aki ta cu nan a constata brote di e virus den e establecimentonan nocturno den e diferente paisnan aki, especialmente door di personanan iresponsabel cu no ta tene cuenta cu nan comportacion pa cu e reglanan estableci. Esaki ta loke, segun Prome Minister, kier evita na Aruba. Pa no bin cu e medidanan aki tambe na Aruba. 

 

Prome Minister ta haci un apelacion na tur establecimento y club nocturno na Aruba, pa atene na reglanan y leynan. Articulo 4.1 di Decreto Ministerial cu ta wordo publica cada tres dia den cuadro di e crisis aki, ta indica (lid 1) cu tur establecimento, tienda, restaurant y of clubnan nocturno entre otro, tin pa indica unda cada cliente ta para of sinta; (lid 2) e doño di establecimento henter ora mester cumpli cu reglanan di higiene y distanciamento fisico di 1.5m; (lid 3) tur regla di higiene y distanciamento fisico di 1.5m ta aplicabel pa actividadnan pafo di e establecimentonan tambe; (lid 4) si cualkier establecimento viola un di e reglanan menciona, e por wordo cera temporalmente door di Polis. 

 

Prome Minister a enfatisa cu e ultimo aki no ta un regla nobo sino ta para den leynan di e crisis aki desde principio y ta lamentabel cu hopi doño y cliente no ta atene nan mes na dje. Esaki ta causa hopi preocupacion y molester cerca demas ciudadanonan cu ta tuma e crisis aki na serio y ta afectando con nos turistanan ta sinti nan mes na Aruba. Esaki sigur, Prome Minister a duna di conoce, ta motibo fuerte pa cuminsa actua cu man duro. 

 

“Ta importante pa cada ciudadano y doñonan di establecimento tin bon comportacion awo cu tur establecimento por habri y paga salario na nan trahadonan y pa nan mes tin nan entrada y contribui tambe pa nos economia draai. Tin regla, tin ley. Cuerpo policial lo cera tur establecimento cu no ta cumpli cu tur regla. E crisis aki ta hopi serio. Nos ta den e crisis ainda. Por ta ainda e peor mester bin. Pero e unico manera cu nos por sali vencedor di esaki ta si nos cada un mantene nos mes na e disciplina y e comportacion cu nos tin mester. 

 

Aruba na e momentonan aki ta pasando den hopi reto pareu. Gobierno mester atende cu e tema economico y trece actividad economico bek na Aruba. Gobierno mester atende cu e tema financiero, pasobra no tin finansas suficiente pa cubri tur tarea di Gobierno. Tin reto riba e tereno di salud. Prome Minsiter ta finalisa pidiendo cada ciudadano pa coopera cu Gobierno. 

 

“Coopera cu nos. Cu bo comportacion nos lo vence e crisis aki di berdad”.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: