Gobièrnu den krisis okashoná pa su mes hasí
Den un pais kaminda kosnan ta kana ordená, nos lo no por a yega kaminda nos ta awe ku un
Gobièrnu ku no tin mayoria, pero ta nenga di bai Gobernador.
For di djasabra 18 di yüli 2020, un parlamentario a kita su sosten for di su partido den koalishon.
Despues nos por a tuma nota den medionan di komunikashon ku Minister Presidente di Kòrsou a
deklará ku e tabata tin un kòmbersashon masha positivo mes ku e parlamentario riba djadomingu
último.
Si MinPres ta respeta reglanan di demokrasia, dikon e no a firma na e momento ei un akuerdo di
gobernashon nobo pa sigurá ku e ta keda ku un mayoria. Nos por asumí e momentu ei ku esei no
tabata prioridat. Esta pa Kòrsou tin un Gobièrnu.
Na e momento ei e tabata tin un otro plan kaminda e lo a bai krusa deseonan di e parlamentario,
esta pidi e minister di GMN keda den su puesto tòg maske ta netamente e minister ei a pèrdè su
sosten.
Pa e wega aki ku MinPres a hunga, te awe Gobièrnu no tin sosten mas di mayoria.
Ta insolito ku señor Rhuggenaath dor di su akshonnan ta skohe pa laga Kòrsou 5 dia sin gobièrnu
sin presentá komo lider responsabel ku un solushon.
Sr. Rhuggenaath ta hasi lokual ku e ta hasi semper, keda ketu i laga otro nan buska solushon.
Defakto, Minister Presidente ta preferá di laga medionan di komunikashon bai kuminsá yama tur
partido pa sa kiko nan ta pensa riba e situashon ku e mes a krea ku a pone ku e Gobièrnu no tin
sosten mas di mayoria.
E solushon ta den man di Minister Presidente ku ta representá Gobièrnu.
Hamas por benta e responsabilidat riba ningun otro hende pa motibu ku ta e ta e lider di e pais.
Por sierto, ta Sr. Rhuggenaath komo formadó a okashoná e debakle ku e ta aden awor, paso for di
e proseso di skrining e mester a hasi un mihó trabou pa evitá ku señora Alcala Walle lo a hañ’é
den e situashon aktual i kaminda Gabinete Rhuggenaath no tin sosten.
E Gobièrnu aki a sekuestrá Parlamento pa mas ku 3 aña kaba.
Nan a pone 12 persona ku ta hasi lokual ku nan lider polítiko ordená nan en bes di kontrola
Gobièrnu manera un Parlamento mester hasi. Di e forma aki ta silensiá bos di e miembronan di
oposishon i paralisá Parlamento. Asina kaminda tabata liber pa un Gabinete diktatorial por a hasi
i deshasí ku e pueblo aki. Parlamento hasiendo uso di su derechi di hasi pregunta por manda
kuantu karta ku nan ke pa Gobièrnu, pero Gobièrnu simplemente no ta kumpli ku lei i no ta
kontesta representantenan skohí pa pueblo den oposishon.
Pueblo a vota pa tur e partidonan ku ta representá Parlamento i no pa e partidonan den koalishon
so. Na momento ku gobièrnu ta sistemátikamente pone partidonan den oposishon un banda, nan
ta demostrando nan falta di rèspèt pa demokrasia. Esaki ta un forma maligno pa dominá e órgano
di mas altu di pais ku ta Parlamento pa asina por eskivá kòntròl i hasi i deshasí.
Awor, despues di mas ku 3 aña, derepiente partidonan den oposishon ta wordo tildá ku nan no ta
respetá demokrasia? Esaki ta un palabra ku PAR, MAN i PIN no konosé of no a praktiká niun
momento.
No ta usa demokrasia ora ta na bo kumbinensia i ora e no ta kumbiní ta poné un banda.
Djis pa menshoná algun kaso kon Gobièrnu a aktua diktatorial:
A negoshá i regalá 5000 mion meter kuadra di pais pa $1 pa 60 aña ku Klesch sin a bini
Parlamento. Mas ainda a nenga di duna dokumento pa informá pueblo tokante di su patrimonio.
A bende UTS ku tin 1000 mion florin na infrastruktura pa 142 mion, kaminda ta 61 mion so pais
a risibí te awe.
Movementu Progresivo ta para riba e echo ku e lider di e pais aki esta señor Rhuggenaath, ta esun
ku mester solushoná e situashon aki ku e mes a krea. E mester hasi esaki rápidamente pa motibu
ku nos pais ta den un krísis kaminda tin hopi hende ku hamber, sin trabou i den nesesidat.
Ta insolito ku un minister president ta pará ku dos man lam i ta warda otronan solushoná un
situashon ku e mes a krea ku su weganan pa poder i sin tene kuenta ku e konsekuensianan ku
esaki tin pa nos pueblo.
Movementu Progresivo
Lider polítiko: Dr. Marilyn Moses,
Presidente: Anthony Hollander,