Stroba un Parlamentario pa drenta Parlamento ta kontra demokrasia.

Stroba un Parlamentario pa drenta Parlamento ta kontra demokrasia.

Un gran desapunto pa eksperensiá ku den un pais demokrátiko ta stroba un representante di pueblo ku a keda elegí den e último elekshon pa Parlamento, di ehersé su derecho ankrá den Areglo di Estado.

 

Pa representá pueblo mi ta konsiderá un tarea sagrado i importante pa bienestar di pueblo di Kòrsou. Konformé nos areglo di estado un Parlamento mester konsisiti di 21 miembro. Na e momento nan aki, tin 20 miembro. 

 

Dor di fayesementu di nos kolega di PAR i eks presidente di Parlamento Junior Millerson, un puesto di parlamentario a bini liber. Resientemente Konseho Supremo Elektoral a informá mi persona ku mi a keda elegí pa e posishon di Parlamentario. 

 

Ku honor ami a aseptá e enkargo aki i ku konfiansa den demokrasia di mi Pais Kòrsou mi a entregá mi kredensialnan na Parlamento. Sinembargo awe durante di reunion di Parlamento a keda konstatá ku algun miembro di Parlamento a skohe pa no bini reunion i a stroba mi persona pa drenta den Parlamento, pa yena e funshon ku a keda liber den frakshon di PAR bèk. 

 

Komo miembro di Parlamento pa Frakshon di PAR lo mi duna full mi aporte i sosten na Pais Kòrsou i Gabinete Rhuggenaath pa sigui traha na interes di nos Pais Kòrsou i defendé nos demokrasia.

 

Mi a tuma nota ku e reunion aki lo kontinuá djaluna próksimo i mi ta spera ku sano huisio lo prevalesé i ku  miembronan di Parlamento lo kumpli ku nan huramentashon ku ta enserá respèt pa nos Areglo di estado. 

Shaheen Saad Elhage