Komunikado PARLAMENTO

 

Djaluna 27 di yüli 2020
Mirando e último desaroyonan rondó di funshonamentu di Parlamento, Presidente
di Parlamento, sra. Ana Maria Pauletta, ta haña nesesario pa informá komunidat di
Kòrsou atrabes di Prensa di e proseso ku a kana te ainda pa trata na yena e vakatura
den Parlamento. Aki ta sigui un rekuento kronológiko di e echonan.
Konforme e Areglo di Estado di Kòrsou, Parlamento ta konsistí di 21 miembro (art.
40). Despues di fayesimentu di sr. Millerson (q.e.p.d.) dia 20 di yüni 2020 a surgi un
vakatura den Parlamento. Konforme artíkulo 123, insiso 3 di e Kiesreglement,
Presidente di Parlamento a manda un notifikashon por eskrito di esaki na Presidente
di Konseho Supremo Elektoral (KSE). Esaki a sosodé dia 22 di yüni 2020.
KSE na su turno a kana e prosedura pa informá e siguiente kandidato riba lista. Dia
29 di yüni 2020 KSE a informá sra. M. Alcalá-Wallé ku e a keda skohé pa drenta
Parlamento. Sra. Alcalá-Wallé a aseptá su eskoho pa bira miembro di Parlamento dia
7 di yüli 2020. KSE siguientemente a informá Presidente di Parlamento dia 8 di yüli
2020 di esaki i a manda e kredensialnan pa Parlamento.
Konforme artíkulo 111 di Kiesreglement, Parlamento ta enkargá ku aprobashon di
kredensialnan di su miembronan. Esaki a tuma lugá den e Reunion Públiko di
Parlamento (dia 17 di yüli 2020), bou di e punto di agènda ‘Dokumentonan ku a
drenta Parlamento’. Riba mesun fecha Presidente di Parlamento a notifiká
Gobernador, KSE i sra. Alcalá-Wallé di e aprobashon di e kredensialnan. Esaki
konforme artíkulo 126, insiso 1 di Kiesreglement.
Sra. Alcalá-Wallé a manda un karta konforme artíkulo 126, insiso 2 Kiesreglement pa
Gobernador di Kòrsou, fechá 17 di yüli 2020, den kua e ta informá Gobernador ku e
ta dispuesto pa hasi huramentashon.
A stipulá komo fecha di huramentashon djawebs 23 di yüli 2020.
Dia 21 di yüli 2020 Presidente di Parlamento a risibí un karta di sra. Alcalá-Wallé ku e
ta distansiá di e asiento den Parlamento. Konforme artíkulo 124 Kiesreglement un
miembro di Parlamento, kende a keda atmití, por tuma su retiro na kualkier
momento. Presidente di Parlamento na su turno a informá Presidente di KSE di e
retiro aki konforme artíkulo 124 Kiesreglement. Esaki a sosodé pa medio di karta
fechá 21 di yüli 2020. Kopia dje karta aki a bai tambe pa Gobernador di Kòrsou.
Konforme regla i proseduranan KSE a pasa over na e proseso pa yena e puesto
vakante aki den Parlamento. Un dje tareanan di KSE ta pa kuida integridat di e
prosesonan elektoral di Parlamento. Den e kuadro aki KSE ta hasi sigur ku tur regla i
lei a keda enkaminá korektamente, promé ku sigui pa informá e siguiente kandidato
riba lista.
Dia 22 di yüli 2020 KSE a informá sr. S. Elhage ku e a keda skohé pa drenta
Parlamento. Sr. Elhage a aseptá su eskoho pa bira miembro di Parlamento dia 22 di
yüli 2020. KSE siguientemente a informá Presidente di Parlamento dia 22 di yüli 2020
di esaki i a manda e kredensialnan pa Parlamento.
Presidente di Parlamento a planifiká e Reunion Públiko pa aprobá kredensialnan di
sr. Elhage riba djabièrnè 24 di yüli 2020. Pa por habri un Reunion Públiko,
Parlamento mester tin quorum (art. 56, insiso 1 Staatsregeling). E reunion aki no por
a tuma lugá pa falta di e quorum nesesario. Presidente di Parlamento a kana e
prosedura di Reglamento di Orden (art. 66 RvO) pa konvoká e reunion un bes mas
riba djaluna 27 di yüli 2020.
Djaluna 27 di yüli 2020, un bes mas, e Reunion Públiko di Parlamento no por a tuma
lugá pa falta di quorum. Solamente 10 miembro di Parlamento tabata presente na
inisio di e reunion, lokual no ta sufisiente pa por habri e reunion.
Presidente di Parlamento a tuma nota di un argumentashon den kual ta purba splika
ku e proseso di retiro di sra. Alcalá-Wallé no a kana konforme Kiesreglement. Segun
e argumentashon aki, Gobernador mester manda un karta pa Presidente di
Parlamento a base di artíkulo 126, insiso 4 Kiesreglement. Esaki ta enserá ku
Gobernador ta informá Presidente di Parlamento despues di un periodo di 4 siman
ku e miembro no a presentá pa hasi huramentashon.
Den e kaso spesífiko aki esaki no ta aplikabel, mirando ku sra. Alcalá-Wallé a tuma
retiro promé ku e fecha di huramentashon, konforme artíkulo 124 Kiesreglement.
Konsekuentemente no ta nesesario pa warda e periodo menshoná den artíkulo 126
Kiesreglement. E puesto den Parlamento a bira vakante for di momento di e
notifikashon di sra, Alcalá-Wallé ku e no ta dispuesto mas pa aseptá e asiento den
Parlamento. E proseso aki a keda konfirmá ku KSE asta promé ku a manda
informanan ofisialmente por eskrito di e retiro di sra. Alcalá-Wallé.
Mirando e situashon den kual Parlamento ta aden, por konkluí ku e sistema di
demokrasia parlamentario a drenta den un impase, kual ta hasi imposibel pa esaki
funshoná. Esaki ta bai kontra di e derecho di votadó ku ta skohe den un elekshon
liber 21 Parlamentario. No por ta asina ku algun parlamentario ta skohe pa pueblo
ken por i no por bira parlamentario. Presidente di parlamento ta konta ku sano
huisio lo prevalesé i miembronan ku nan debernan ankra den nos leinan.

This site uses Akismet to reduce spam. Learn how your comment data is processed.

error: Content is protected !!
%d bloggers like this: