Kon pa yuda prevení atrako den kas.

 

KOMUNIKADO DI PRENSA 312 / 2020
12 ougùstùs 2020
Kon pa yuda prevení atrako den kas.
Departamentu di Komunikashon i Prevenshon

KUERPO POLISIAL KÒRSOU SIRBI I PROTEHÁ

Manera ya Kuerpo Polisial a bin ta alertá, ku siudadanonan mester tene kuenta ku
ladronisia ku violensia (atrako) tin un tendensia di ta oumentá último simannan.
Seguidamente polis ke duna algun rekomendashon kon pa prevení espesialmente pa
atrakonan ku ta tuma lugá den bibienda.
– Sòru pa sufisiente iluminashon rondó di bo kas. Por hasi uso tambe di ‘motion
detector’ kombiná ku lusnan fiho ku ta keda sendé henter anochi;
– No laga vegetashon den bo kurá manera palunan grandi i matanan tapa bista di bo
kas. Si algu straño ta sosodiendo na bo kas, bisiñanan òf personanan ku ta pasa riba
kaya pafó no ta mira;
– Por pone lòk dòbel riba bo portanan di pafó, di manera ku ta difikultá malechornan
su entrada. Por hasi uso tambe di “dievenklauw”. Mas tempu e mester tuma pa
penetrá, ménos atraktivo bo kas ta bira p’e;
– Kita tur opheto innesesario manera trapi, barí ets for di den bo kura di kas. Esakinan
ta duna e atrakadó akseso fásil na bo bibienda;
– Sigurá bo mes, ku bo bentananan ta sera bon, tin bon lòk i ta difísil pa habri
esakinan di parti pafó;
– No laga nada di balor den bo kas, di manera ku e ta visibel for di pafó;
– Evitá di warda montante grandi di sèn na kas. Prinsipalmente serka propietarionan
di negoshi, ta esaki ta loke e atrakadónan ta bin buska;
– Si por, laga instalá kámara na bo kas. Esaki tambe por desanimá e atrakadó;
– Den kaso ku bo tin e posibilidat, laga instalá alarma na bo kas. Por aktivá esaki na
momentu di un atrako i asina hala atenshon di abitantenan. E chèns ta grandi ku e
atrakadónan lo sali na kareda;
– Si bo lanta den anochi/mardugá pa sea bebe awa òf bai tualèt, sende lus den kas un
ratu. Kisas asina bo a aktivá nèt promé ku un malechor trata na kibra drenta;
– Si sea bo kachónan òf di bisiña ta grita insesantemente, no neglishá esaki. Lur den
bo bentana si tur kos ta na òrdu pafó, promé ku bo sigui drumi;
– Na momentu ku bo ta yega kas anochi, si tin mas hende na kas, avisá nan ku bo ta
yegando pa nan wak bo;
– Evitá di usa e mesun ruta pa bo yega bo kas. En bes di e malechor sorpresa bo, abo
lo ta di sorpresa p’e;
– Na kaminda pa kas, keda alerta i wak bo alrededor i tin tinu pa e tráfiko bo tras. Si
bo nota ku un outo ta sigui bo, kambia di ruta pa sigurá bo mes ku ta abo e ta sigui.
Si e situashon ta bira hopi sospechoso yama polis òf kore yega na e warda di mas
serka;
– Si bo ta wòrdu persiguí, kuminsá pita. Esaki ta hala atenshon di otronan i por skapa
bo;
Semper ta bon pa den tur kaso di atrako òf intento di esaki bo:
 Trata na kapta deskripshon di e sospechoso;
 Purba wak kon el a move (sea den outo, riba baiskel òf na pia);
 Si por, nota number, marka, modèl i kolo di e vehíkulo;
Bou di tur sirkunstansia:
Mantené kalmu;
Aseptá e situashon;
No resistí;
Duna loke bo tin. Bo bida bal muchu mas;
Opservá!

This site uses Akismet to reduce spam. Learn how your comment data is processed.

%d bloggers like this: