Djadumingu aki OW ta drecha vangrailnan riba e kaminda ku ta kondusí pa Brùg Juliana

Djadumingu aki OW ta drecha vangrailnan riba e kaminda ku ta kondusí pa Brùg Juliana

Geplaatst op 20 August 2020 dor di Ministerio Tráfiko, Transporte i Planifikashon Urbano

Willemstad – Servisio pa Obra Públiko (OW) ta informá ku djadumingu 23 di ougùstùs lo drecha e vangrailnan den área di Brùg Juliana.
Manera ta konosí na diferente sitio aki na Kòrsou, prinsipalmente den área di brùg, e vangarailnan a sufri hopi daño a konsekuensha di aksidente(nan). E daño kousá na e vangrailnan aki tin biaha ta asina serio ku no por drecha esaki mesora, pero mester remplasá nan kompletamente. E situashon kaminda outo ta dal i hasi daño na nos mobilario riba kaya ta hiba na gastunan èkstra pa Gobièrnu di Kòrsou.

Djadumingu awor OW i e kontratistanan den koperashon ku Kuerpo Polisial (KPC) lo kuminsá ku e trabounan pa drecha e vangrailnan. Aqualectra tambe lo tei pa drecha poste i lusnan di kaya ku ta dañá. E trabounan ta kuminsá for di 6’or di mainta te 7’or di anochi. Pa por kumpli debidamente ku e trabounan, lo sera un via di Brùg Juliana kada banda. Pues lo por hasi uso di solamente un via pa subi i baha brùg. Di parti di Punda lo sera for di Kadaster te na Seru Domi, i pa parti di Otrobanda for di despues di lusnan di tráfiko na Seru Domi te na lusnan di tráfiko di Kaya Geraldine Gutierrez.

Na momento ku e trabounan ta tuma lugá lo pone e bòrchinan di indikashon nesesario pa protekshon di e trahadónan. Ta kuminsá pone e bòrchinan di indikashon for di edifisio di Kadaster i subi brùg. Tambe e via ku ta subi brùg for di Scharloo pa Otrabanda, i di Arubastraat pa bai Punda, meskos tambe di Panamastraat pa bai Punda. Pues djadumingu awor Brùg Koningin Juliana lo ta aksesibel atraves di un via so kada banda.

Minister di Tráfiko, Transporte i Planifikashon Urbano, Zita Jesus-Leito ta satisfecho ku por drecha e vangrailnan i ta hasi un apelashon na outomobilistanan pa kore ku koutela. Si ta posibel hasi uso mas tantu di otro vianan.