Djaluna awor lo habri Parke di Palu di Mangel 1 su konekshon ku laman.

 

Djaluna awor lo habri Parke di Palu di Mangel 1 su konekshon ku laman.

 

Willemstad – Trabounan pa desaroyo di e área di Rif, prinsipalmente pa loke ta e Parke di Palu di Mangel 1 ta desaroyando poko-poko, pero sigur. Limpiesa di e awa a tuma lugá i awor ta asina leu ku por habri e kanal pa awa fresku di laman drenta. Na promé instante lo laga awa di laman drenta, pa despues segun e proseso natural, awa di e parke por sali bai laman. Djaluna dia 14 di sèptèmber ta asina leu ku e trabounan lo kuminsá. E trabounan ta dura dos dia.

 

E instanshanan vital den e proseso aki, esta Carmabi, Domeinbeheer, Servisio Meteorológiko, Obra Públiko (OW) i e Ministerionan di Salubridat (GMN) i Tráfiko, Transporte i Planifikashon Urbano (VVRP) ta vigilá henter e proseso di aserka pa asina e trabounan por tuma lugá ku e diligensha i koutela nesesario. 

 

Promé ku a tuma e desishon pa habri e kanal, a analisá e awa na diferente punto. Esaki pa wak si e awa ta seif i ku por lag’é sali bai laman. A base di e análisis hasi, a konstatá ku e awa ta limpi, e no ta kontaminá, i e ta kumpli ku normanan europeo stipulá pa ‘zwemwater’. Únikamente komo medida di prekoushon a yega na un akuerdo ku Corendon ku e playa di Corendon lo ta sera pa uso pa dos dia. Corendon a bai di akuerdo ku esaki. 

 

OW lo analisá e awa strukturalmente riba su kalidat, durante di dos siman, tantu na parke di palu di mangel komo na e playa di Corendon. E proseso pa renobashon kompletu di e awa, den un forma natural, lo tin un durashon di mas o ménos dos siman, despues di kua por ripara un kambio, esta ku e awa ta limpi. Pues den transkurso di e dianan despues ku habri e kanal, lo por tuma nota di un awa brùin ta sali for di e área di palu di mangel, entre Pisina Benny Leito i Corendon, i subi laman ganchu. Esaki ta algu paresidu na Sargasum, i segun investigashonnan sientífiko di e awa, no ta dañino pa hende ni bida marítimo den e área. 

 

E kambio aki lo ta un kontribushon hopi grandi na nos medio ambiente i lo eliminá tambe e holó desagradabel i e sanguranan ku aworakí por eksperensia den e área. E awa limpi ta importante tambe pa e palunan di mangel ku tin den e área aki. Esakinan lo por sigui krese bon i fuerte. E paso aki ta unu hopi importante pa loke ta saneamentu di e área di Rif. 

 

Asina nos Rif ta sigui desaroyá!

This site uses Akismet to reduce spam. Learn how your comment data is processed.

error: Content is protected !!
%d bloggers like this: