Global Entrepreneurship Week DC ta lansa promé ‘pitch competition’ virtual interinsular pa empresanan 

 

Global Entrepreneurship Week DC ta lansa promé ‘pitch competition’ virtual interinsular pa empresanan 

PHILIPSBURG / WILLEMSTAD – 1 di Òktober a bira un fecha históriko pa selebrashon di Global Entrepreneurship Week (GEW) riba nos islanan.Durante oranan di mainta a informá via plataformanan virtual ku e aña aki lo tene un ‘Pitch Competition’ entre empresanan di impakto haltu pa ekonomia di Sint Maarten i Kòrsou. E kompetensia lo tuma lugá di un forma virtual durante di Global Entrepreneurship Week, ku e aña aki ta di 16 pa 22 di Novèmber. A anunsiá alabes durante di e konferensia di prensa virtual ku,  te na e momentunan aki, e Kámaranan di Komèrsio i Industria di Kòrsou (KvK) i di Sint Maarten (COCI) i Banko Sentral pa Kòrsou i Sint Maarten (CBCS) lo ta partner den e proyekto. E kompania ku lo ta responsabel pa preparashon i ehekushon di e ‘kompetensia virtual’ ta Power Wealth Revolution (PWR) di Sint Maarten. PWR den luna di yüni di e aña aki a organisá un kumbre virtual di 3 dia pa empresanan. E kumbre aki tabata hopi positivo, motibu pa kua un di e spònsernan di e kumbre, CBCS, a pidi PWR pa organisá un evento durante di e Global Entrepreneurship Week (GEW) pa aña 2020. E evento a bira e ‘Pitch Competition’; iFounded 2020. Tantu e Kámara di Komèrsio i Industria di Kòrsou (KvK), komo esun di Sint Maarten (COCI) a gusta e proyekto i a bai di akuerdo pa ta partner.

Sra. Ife Badejo, direktor general di Power Wealth Revolution, a bisa di ta sumamente honrá ku nan organisashon a haña e konfiansa di e partnernan aktual pa organisá e ‘kompetensia’. “Nos ta espasio pa risibí sosten di mas partner, komo ku e proyekto aki mester bira unu di impakto haltu pa nos ekonomia i sektor empresarial.” Den mesun rosea sra. Badejo a bisa ku su persona i sra. Elgenia Pieternella, presidente di  Fundashon Negoshi Pikiña, ya pa algun aña a bin ta papia di e posibilidat di un kolaborashon pa asina Sint Maarten tambe por organisá algun evento pa stimulá ‘entrepreneurship’  na Sint Maarten durante di GEW, fortifiká i ekspandé aliansa ku otro islanan den Karibe pa hasi mas negoshi huntu. E aña aki a firma un akuerdo.

Na aña 2014 Fundashon Negoshi Pikiña ta haña e lisensia serka Global Entrepreneurship Network (GEN) pa stimulá e ‘siman empresarial’ na e islanan di Karibe Hulandes. Despues di a inisiá ku un GEW na 2015 Kòrsou, e siguiente aña a ekspandé aktividatnan ku diferente inisiativa pa isla di Boneiru. E aña Sint Maarten a djòin e famia i lo selebrá Global Entrepreneurship Week pa promé biaha riba e parti Hulandes di e isla. Tantu sra. Pieternella, komo sra. Badejo, a bisa di ta hopi kontentu ku por a konkretisá e kolaborashon ku a bin ta traha riba dje ya pa algun aña. Nan tur dos a gradisí e konfiansa depositá pa e partnernan Kámara di Komèrsio i Industria di Kòrsou (KvK) i di Sint Maarten (COCI) i Banko Sentral pa Kòrsou i Sint Maarten (CBCS) den e proyekto di e ‘Pitch Competition’.

Kompanianan di Kòrsou i Sint Maarten por kuminsá inskribí. Kondishonnan ta ku: 1.) e kompania mester ta registrá na sea Kámara di Komèrsio i Industria di Kòrsou (KvK) òf di Sint Maarten (COCI). 2.) E kompania mester ta eksistí no mas ku 3 aña. 3.) e kompania mester por demostrá ku e tin (òf por krea) impakto haltu sosial / ekonómiko den ramo digital, sosial, kreativo i ekonomia bèrdè. 

E último fecha ku por apliká ta 30 di Òktober pa 11.59 di anochi. Lo skohe 20 kompania pa pasa pa e fase semi-finalista. Pa mas informashon òf aplikashon bishitá e website https://www.islandfounded.com òf manda un E-mail na info@experiencepwr.com.

This site uses Akismet to reduce spam. Learn how your comment data is processed.

error: Content is protected !!
%d bloggers like this: