E promé Vlakte Run 2020 di Brigada di Seguridat I Formashon tabata un eksito

E promé Vlakte Run 2020 di Brigada di Seguridat I Formashon tabata un eksito

 

Willemstad: Durente di wikènt tras di lomba Brigada di Seguridat i Formashon a organisá e promé edishon di BSF Vlakte Run. BSF Vlakte Run ta un kompetensia interno kaminda e peletonnan (grupo) di Brigada mester kompetí kontra di otro dor di kore Vlakte di san pedro. E peloton ku yega promé kumpliendo ku e reglanan di wega a optené e premio maksimo. Durante di algun siman miembronan di Brigada di Seguridat i Formashon a prepará nan mes fisikamente i mentalmente pa por partisipá na e kompetensia aki.

 

Djasabra, 31 di oktober pa 6.30 di mainta tur miembro a reuní na Kazerne di Brigada di Seguridat i Formashon na Mundu Nobo Laufferstraat z/n, kaminda nan a drenta konvoi pa bai na Boka san pedro. Na momentu nan a yega tur peloton a haña oportunidat pa kalentá i despues di konteo kada peloton a kuminsá “speedmars” pa asina yega na e punto final kual ta e lugá di parkeo di Curinde, Hato.  Na final tur partisipante, lidernan i boluntario por a disfrutá di fruta, kos di bebe i sòpi, pa despues Komandant Derrick James a duna tempu di kada peloton I anunsiá e ganadó.

 

Tres peloton a kompetí I e peloton 19.1 a bai ku e viktoria. Nos ke yama pabien na e peloton aki ku di un forma profeshonal, determiná I den union a trein i partispá na e Vlakte Run aki. Sargeant- Majoor J. Wilson i Sargeant F. Bentura a mustra liderasgo pa asina huntu ku nan grupo bai ku e premio. Un pabien tambe ta na e dos otro pelotonan ku a duna tur di nan banda pa trese un bon kompetensia. 

 

Brigada di Seguridat I Formashon ta sigui brinda training ku ta motivá hóbennan pa nan ta aktivo den un proseso di formashon i disiplina.  Nos ta hopi orguyoso ku e miembronan di Brigada di Seguridat I Formashon.