Destaho Públiko pa maneho di parkeo den sentro di siudat ta inisiá

Destaho Públiko pa maneho di parkeo den sentro di siudat ta inisiá

Geplaatst op 18 November 2020 dor di Ministerio Tráfiko, Transporte i Planifikashon Urbano

WILLEMSTAD – E siman aki Ministerio di Tráfiko, Transporte i Planifikashon Urbano (VVRP) ta kuminsá ku e proseso di destaho públiko pa haña un operadó nobo pa maneho di parkeo den sentro di siudat pa e periodo di 2021 pa 2025.

VVRP ta hasi un yamadá na kompanianan i organisashonnan ku ta deseá di partisipá na e destaho públiko akí pa entrante djaweps 19 di novèmber 2020 tuma kontakto ku Servisio pa Obra Públiko (OW). OW ta enkargá ku kordinashon di e destaho i pues lo tin tur  informashon, splikashon i e “bestek”.

Dikon destaho públiko?
For 2010 e kompania privá Global Metals, konosí komo Parking Authority Curaçao (PAC) ta manehá e lugánan di parker (ku ta públiko) den sentro di siudat. Esaki basá riba un destaho públiko ku a keda tené na aña 2007. E Kolegio Ehekutivo di Kòrsou di e tempu ei a tuma e desishon pa buska un partner privá pa hasi e trabounan akí na nòmber di Gobièrnu di Kòrsou. E desishon tabata basá riba konseho di un komishon instalá speshalmente pa evaluá e opshonnan pa optimalisá ehekushon di e maneho di parkeo. Den aña 2018, VVRP a hiba kombersashon ku PAC pa yega na un akuerdo di maneho ku a keda trahá di forma retroaktivo for di 2010, pa e 10 aña ku a kumbiní ku PAC despues di e destaho.

E motibunan pa kual a rekurí na un destaho públiko pa buska un partner privá na 2007 pa manehá parkeo den sentro di siudat, ainda ta vigente.  E destaho públiko nobo lo ta basá riba un “bestek” mehorá den kua a tene debido kuenta ku e eksperensia te ku awor ku PAC, i e Nota di Maneho pa parkeo den sentro di siudat di 2017. Alabes a prosesá e diferente puntonan ku a keda presentá pa SOAB i Kontrolaria General di Kòrsou den e diferente rapòrtnan ku nan a emití den e último añanan riba e tópiko aki.

Gobièrnu tin intenshon pa firma un kontrato di 5 aña den e promé trimèster di 2021 ku e organisashon òf kompania ku gana e destaho públiko. E organisashon akí pues mester kumpli ku tur e rekisitonan operashonal, finansiero i legal. E organisashon lo manehá e lugánan di parker (públiko) den sentro di siudat den e añanan 2021 te ku 2025 na nòmber di Gobièrnu di Kòrsou.

Ta konosí ku den último simannan tabatin konsternashon pa e situashon di parkeo den sentro di siudat. Parking Authority Curaçao (PAC) a anunsiá di forma inesperá di no ta sigui mas ku e trabounan. VVRP a tuma kontakto mesora ku PAC pa a sinta na mesa i yega na palabrashonnan nobo. Esaki a logra, i por indiká ku ya for di siman pasá, PAC a kuminsá bèk ku kontrol riba parker den sentro di siudat.

This site uses Akismet to reduce spam. Learn how your comment data is processed.

error: Content is protected !!
%d bloggers like this: