Pa desaroyo di nos turismo mester tuma desishon ku vishon

 

Pa desaroyo di nos turismo mester tuma desishon ku vishon


Willemstad 19 di novèmber 2020 – Riba djárason 18 di novèmber, lider di VISHON Miles Mercera a tene un presentashon tokante su vishon pa desaroyo di Turismo. E tema di e presentashon tabata TURISMO 2030. Esaki tabata e promé parti di e presentashon kaminda el a papia tokante e situashon aktual di turismo. Den e di dos presentashon, kual lo tuma lugá riba un otro fecha, Miles lo kompartí e vishon pa turismo den 2030.

Mercera a kuminsá e presentashon bayendo bèk na inisio di turismo ku den añanan sesenta a kuminsá komo un industria di kasino. Na kuminsamentu di aña 2000 a kuminsá mira subida den e kantidat di turista ku tabata bishitá nos isla. Den e periodo di aña 2000 pa 2013 e kantidat di turista a multipliká ku kuater i esaki a sigui desaroyá segun añanan ta pasa. Pero kon ta pará ku e parti ekonómiko? Awor aki ku nos ta den e temporada di COVID-19, nos ta kere den turismo ainda? Preguntanan klave ku e yu di Kòrsou preokupá ta hasi su mes.

VISHON ta traha ku sifra i dato pa asina lokual wòrdu tresé dilanti ta bon fundamentá. Pa kada 44 persona ku bishitá nos isla, esaki ta krea 1 kupo di trabou den e sektor turístiko i pa kada 30 sèn ku nos invertí den turismo nos ta haña 1 florin bèk. Ta poko sektor tin un “return of investment” haltu asina riba término korto. Banda di esaki nos no mester mira turismo komo un sektor apart; turismo tin efekto riba tur otro sektor. Edukashon ta forma e liña kòrá den esaki. Segun Mercera turismo mester bira parti di e kuríkulo di skol. Komo país kaminda gran parti di nos entrada ta bini di turismo, nos mester trese konosementu i desaroyá profeshonalnan riba e tereno aki.

E pregunta klave ta keda, kon gobièrnu por sostené sektor di turismo? Mercera ta enfatisá ku turismo por ta eksitoso solamente ora nos hasi e kambionan nesesario. Nos mester bini ku kambio pero tambe mester sigui ku lokual ta bon kaba. Manera por ehèmpel pa años kaba mester forma un ‘Curacao Tourism Authority’ (CTA) pa por trese e sektor públiko i esun privá huntu. Un plan ku manera hopi otro a keda para sin wòrdu ehekutá. Meskos ta konta pa e Tourism Masterplan di kual tin tres vershon ku a wòrdu aprobá pero no ta keda implementá, pasó no ta pone finansa disponibel. Pa desaroyá turismo mester tin sèn, i -lastimamente nos ta laga biones bai perdí. Esaki por gran parti tin di aber ku nos struktura di impuesto. VISHON ta boga pa reformá nos struktura di impuesto i hasi esaki mas aksesibel pa por saka benefisio pa e sektor di turismo tambe. Kon ta hasi progresá si mester papia ku 4 persona di diferente ministerio pa por trese kambio den e sektor di turismo?

Lo dura sigur tres aña promé ku nos por rekuperá kompletamente for di e impakto ku COVID-19 tabata tin riba nos ekonomia. Den periodo aki mester invertí den turismo sostenibel. Mester inkluí komunidat pasó nos ta traha di ‘hende pa hende’ i tambe mester pone énfasis riba protekshon di nos medio ambiente. Nos mester puntra nos mes kiko nos ke logra ku turismo riba nos isla i a base di esaki traha di un forma stratégiko i strukturá pa implementá nos vishon. Meskos ku mundu ta kambia, e turista tambe ta kambia i pa fasilitá nos mester digitalisá. E sèn ku ta drenta via e sektor di turismo mester wòrdu invertí den nos mes hendenan.

 “Nunka derochá un bon krísis, ta tempu pa invertí i ta nos responsabilidat komo e gobièrnu di futuro pa fasilitá i habri kaminda pa desaroyo”, ku e palabranan aki Miles Mercera a finalisá su presentashon.

–Pa mira e promé parti di e presentashon aki por bishitá e página di Facebook di VISHON. Keda pendiente pa e fecha di e di dos parti di e presentashon.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: