Segun PIN gobièrnu no mester ta ‘penny wise, pound foolish’! Ta kanta gloria ku 300 trabou den haf pa yate, pero ta blòkiá 2.000 kupo den kanabis.

 

Segun PIN gobièrnu no mester ta ‘penny wise, pound foolish’!
Ta kanta gloria ku 300 trabou den haf pa yate, pero ta blòkiá 2.000 kupo den kanabis.

Willemstad — Gobièrnu Rhuggenaath te ainda no ta duna bista kiko e la hasi durante kasi 2 aña pa
ehekutá e “Groeiaccoord” ku Hulanda. Resientemente den su diskurso di 2 di óktober 2020
Minister-president Rhuggenaath a splika ku: “awor ta e momentu pa nos tuma akshon na
bienestar di nos tur, no tin margen pa sigui bira rònt mas …”, es desir mester aktua ku úrgensia”.
Riba dia di tur defuntu, 2 di novèmber último, gobièrnu a kanta hosana i splika ku e Landspakket i
e lei di reino pa lanta COHO, ta e salbashon pa nos pais, pa djeinan drei bisa komunidat k’e mester
tin pasenshi te febrüari 2021 pa sa kiko tei reformá eksaktamente. PIN a mustra den un
komunikado for di 2 di oktober, ku ta falta splikashon di e reformanan, siendo ku eksito di
reforma ta depende hustamente di sosten di komunidat. Tur esaki no ta indikashon di e forsa,
direkshon i determinashon ku nos ke mira di e gobièrnu.
Komo chèri rib’e bolo komunidat mester para mira tambe kon nos ta despèrdisia oportunidatnan
ku nos mes a krea. Ehèmpel grafíko di esei ta ku e minister di ekonomia, sr. Steven Martina, ta
presenta un maneho di haf ku den su mes palabra lo genera 300 kupo di trabou, pero ayabanda
parlamentarionan di su mes partido, esta Partido MAN i di su partner di koalishon, esta partido
PAR, sin argumento òf motibu valido, ta blokia realisashon di kanabis medisinal, ku na su turno lo
krea entre 1.500 pa 2.000 trabou bon pagá.
Prekupashon
Kanabis medisinal, esta kanabis komo remedi, tin su kuadro i konsepto di lei kla den parlamento pa pasa
tratamentu den reunion públiko. A studia e konsekuenshanan internashonal. A kalkulá e efektonan
ekonomiko. A prepará laboratorio i Inspekshon di Salú. A apuntá tereno. A buska i haña sosten den
komunidat. Ta despues di tur e trabounan ei ku a sosodé riba proposishon di e minister Martina i tambe
di minister Rhuggenaath, partido PIN i su minister Suzy Camelia-Römer a propone un lei i formula e
proseso di produkshon di kanabis medisinal.
Kiko ta resultá? Hustamente e frakshon dje partido ku sr. Martina ta liderá i e frakshon di e partner di
koalishon PAR, ta blokeando e lei pa desaroyo di kanabis medisinal i komo konsekuensia ta pone pia pa
1.500 pa 2.000 yu di tera haña un trabou digno den e sektor aki. P’esei e pregunta: kon serio gobièrnu ta
ku kresementu i independensia ekonomiko di nos pais?
Pa PIN esaki ta un pregunta bálido paso un minister i un gobièrnu ku bèrdat ke kresementu ekonomiko i
ke asumí su resposabilidat, lo a bringa pa kanabis medisinal mes tantu ku nan a bringa pa por firma pa
haña un saku mas di plaka fo’i Hulanda.
E falta di determinashon pa logra nos mes base ekonomiko fuerte ta ahinda mas prekupante paso PIN ta
kòrda bon, kon despues di saneamentu di debe na 2010, a bin un gobièrnu di “spat-sak’i-plaka”. E historia
ei no mag ripití. Pesei, pa kita tur duda i pa sigurá komunidat ku nos mes por krea un base ekonomiko
fuerte pa nos pais, algun pregunta na gobièrnu, espesialmente pa e minister di ekonomia, sr. Steven
Martina:
1. minister Steven Martina ta kere ku loke a sobra di gobièrnu Rhuggenaath tin e obligashon di, en bes
di warda pa Ulanda bin hasi’e pa nos, adelantá reformá i a base di inisiativanan propio kana dilanti
riba “uitvoeringsagenda” dje Landspakket i asina kumplí ku lokual minister Ruggenaath a splika,
esta ku no tin margen mas pa bira rònt?
2. minister Martina ta kla pa hasi maksimo esfuerso pa gobièrnu, espesialmente minister di GMN,
trata e lei di kanabis medisinal den parlamento promé ku fin di aña i habri 2.000 kupo nobo di
trabou pa yunan di tera pa kaba?
3. sr. Steven Martina i Partido MAN por garantisá komunidat ku tin un plan propio pa ekspanshon
ekonomiko i k’e biaha aki si no ta bai hasi koi bon bida k’e sak’i plaka?
Desishon
Partido PIN ke konfiá ku polítika partidista elektoral no por ta hunga un ròl den e retraso ku kanabis
medisinal a sufrí. Pues ta na sr. Steven Martina i kabinete Rhuggenaath pa demonstrá ku nan tambe ta
dotá ku determinashon i forsa di konvikshon pa realisá kanabis medisinal i duna kontenido na nos
outonomia ekonomiko.

This site uses Akismet to reduce spam. Learn how your comment data is processed.

error: Content is protected !!
%d bloggers like this: