Partido Polítiko Maneho Asertá, Visibel I Sigur, TA PRIMINTI I KUMPLI  

Partido Polítiko Maneho Asertá, Visibel I Sigur, TA PRIMINTI I KUMPLI  

 

Semper nos a primintí di bai pre elekshon na yanüari i elekshon pa parlamento na mart 2021 ku un tim chikí, refreskante, íntegro i dediká, ku e ekspertisio nesesario pa drenta i kuminsá traha mes ora.

E promesa ei nos kièr kumpli kune ku dos miembro nobo mas ku ya kaba ta lora nan manga pa asina traha i hasi nos pais mas sigur. Traha pa drecha e sentimento di siguridat di kada siudadano, tantu esun legal, ilegal òf bishitante i pone migrashon riba agènda.

Tur dia di nobo nos ta lesa den prensa ku nos seguridat ta na peliger. For di destrukshon te ku atrako, insendio, asesinato, transporte di droga i korupshon.

Tòg minister di Hustisia ta haña ku nos pais ta un di esnan mas sigur den region. Esei no ta e sentimento ku e pueblo lokal òf esnan na Hulanda ta eksperensia ora ta papia di seguridat. “Un di esnan mas sigur” no ta nifiká nada. Si bo konsiderá un promedio di 25 morto pa aña bou di un poblashon di apénas 165.000 habitante, esei ta bon?   

Si no kompará esaki ku un pais manera Hulanda ku tin 17 mion habitante, esaki lo tabata e ora ei 2500 asesinato pa aña, miéntras Hulanda tin un sifra anual di 117.  Tin algu di gaba e ora ei? I awor kiko, konformá sin hasi nada?

 

Partido MAVIS lo no konformá ora ta trata seguridat i derecho legal. I nos lo basa nos mes tambe riba sifranan konkreto i kompará esaki ku paisnan ku ta kontrolá kriminalidat mihó na lugá di esnan ku ta pió ku nos. Si nos kompará ku e sifranan di kriminalidat na Hulanda, esei ta nifiká ku Kòrsou mester tabatin apénas 1 òf 2 víktima pa aña.

Serka Partido MAVIS e no tin nada di haver ku sifra so. Nos kièr pa tur siudadano i nos bishitantenan ku ta asina importante pa nos ekonomia, SINTI NAN MES SIGUR.

P’esei nos lo midi kada aña si nos ta bon riba kaminda ku nos medidanan, i ku e sentido di seguridat a mehorá òf nos mester hasi mas esfuerso.  

 

Seguridat ora ta trata migrashon tambe ta laga hopi di deseá. For di juli 2017 ministerio di hustisia a tuma registrashon di migrantenan riba su enkargo for di UNHCR, e organisashon di refugiadonan di Nashonnan Uni. 

UNHCR a ser prohibí pa traha na Kòrsou. Te ku awe no a desaroyá un maneho pa migrashon i tampoko no a firma e akuerdo di refugiadonan. E situashon den praktiká ta laga di deseá i e problema di personanan indokumentá i ta birando kada dia mas inkontrolabel. 

 

Nos kandidatonan nobo ta splika mas: 

Eurnich Isenia, 49 aña di edat

Eurnich, mihó konosí komo Urny, ta miembro di nos Kuerpo Polisial Korsou. Loke ta asina bunita di Eurnich ta ku e ta mira su trabou for di dos ángulo. E parti hudisial, pero tambe e parti humano. Hopi biaha despues di oranan di trabou e ta yuda esnan den nesesidat.  Eurnich kièr yuda hasi kambio riba e tereno hudisial i a skohe pa Partido MAVIS, pasobra e partido ta mustra determinashon i di bèrdat kièr logra e kambionan nesesario.  

Nos Partido lo atendé ku kriminalidat den bario i na nos playanan i tambe atende ku e problema alarmante di uso di arma di kandela. Partido MAVIS kièr mas polis riba kaya, vigilansia i mas pòst di polis den bario. Polis mester ta mas serka di e siudadanonan. Kada maneho tin di haver natural ku e nesesidat i e magnitut di kriminalidat den e bario.

Resosialisashon mester ta mas basa riba formashon i servisio komunitario i no riba detenshon so, pa evitá ménos kriminal peligroso.  

Polis i reshèrshi lo ser ekipá tambe ku materialnan digital pa ora di investigashon i kontrole. Manera entre otro number di outo ku GPS i kamara di vigilansia. Tambe dor di kambia i/òf implementá leinan nesesario pa por funshoná mihó.  

Tambe traha riba bienestar di e agente polisial i dune asistensia sikológiko si ta nesesario despues di atendé ku kasonan troumatisante.

Tambe nos lo traha riba komportashon i empatia di e agente polisial ora di duna asistensia via di slachtofferhulp of e proseso di prosès verbal i elevá su konosementu di riba tereno di komunikashon. Mester tin un maneho riguroso den eskoho di un agente polisial i dune e oportunidat pa sigui studia i mehorá su konosementu. 

Kasonan grandi di arma di kandela i transporte di droga lo ser atendé huntu ku sobra partnernan den Reino. Konforme e dekreto gubernamental nos lo invertí den asesorá e ala hudisial i hasi esaki mas efektivo. 

Nos prizòn mester funshoná segun akuerdonan internashonal i ta tambe un sentro di korekshon i reabilitashon i no solamente un sentro di detenshon. I nos kièr hasi un investigashon den e funshonamentu i trato pa ku refugiadonan.

 

Wilson De Lima Meza, 35 aña di edat

“Mi ta un hóben, nase for di un Tata Kurasoleño i un Mama estranhero. Mi a krese na Korsou i a bishita skol militar. Ya pa mas ku 12 aña mi ta laborá den e área di digital, selular i kompüter. Mi ta kontra di inhustisia humano i lo aktua kada biaha ku mi por kontra di esaki. Mi a skohe pa Partido MAVIS, pasobra e partido ta kompletamente komprometé ku nos komunidat sin distinshon di rasa ni kredo. Un partido ku ta na fabor di hustisia i igualdat di derechi humano”.

Huntu ku Partido MAVIS, Wilson kièr traha riba un maneho integral di migrashon i derecho igual pa esnan ku tin un estadia di residensia legal. Integral ta nifiká, ku Partido MAVIS ta hasi un distinshon den migrante voluntario i esun involuntario.  

Pa e promé grupo lo hiba un polítika di imigrashon ku ta ser adaptá na esnan ku ta bin pa buska trabou, hubileo of studiante. E maneho lo ta aksesibel pa empleonan òf kupo di trabou ku difisilmente por ser yena ku talento lokal, pero lo restringí entrada si e kupo di trabou por ser yena aki mes. Di e forma ei nos lo proteha oportunidat di empleo lokal, pero alabes lo sòru pa tin sufisiente talento disponibel pa e kresementu ekonómiko.

Pa e di dos grupo nos lo traha riba un maneho digno di refugiado i lo firma e tratado di Nashonnan Uni pa refugiado mas pronto posibel. Nos lo pèrkurá pa tin lugá adekuá pa e persona indokumentá por permanesé mientras ta atende su kaso. Lo hasi distinshon korekto entre e refugiado i e migrante ekonómiko. 

Algun maneho lo no tin un efekto un-dos-tres riba e sentido di seguridat. Nan lo duna fruta riba término largu manera entre otro mehorá kontrol riba nos frontera. 

Nos tin un kaminda largu pa bai, dor ku gobièrnunan di turno a primintí hopi i hasi poko. 

 

Pero nos tim multi disiplinario ta kla 

Nos tin kandidatonan ku ekspertisio riba bários tereno manera entre otro; ekonomia, turismo, enseñansa, migrashon, desaroyo sosial, salubridat, froude i maneho kontra korupshon. Nos Tim no ta konsistí di tigernan teorétiko riba papel pero tin eksperensia práktiko i ta tigernan di bèrdat. Nos ta kontentu i orguyoso ku nos lista asina balansa. Ku profeshonalnan jòng i adulto. I nos Damanan balente ta bon representá riba lista!  

 

 

Lista di kandidatonan di Partido Polítiko Maneho Asertá, Visibel I Sigur pa Staten 2021 

1	Allen Albertina	Mavis (Mimi) N.
2	Plantijn	Herbert E.
3	Rodrigues Gonçalves	Maria (Zelia) Z.
4	Kooistra Bonifacio	Coraline (Corah) C.
5	Oliana	Rafael (Rafa) P.
6	de Kort	Elisabeth (Laura) M.H.
7	de Lima Meza	Wilson F.
8	Isenia	Eurnich (Urny) S.
9	Gressmann	Hugo (Frank) L.F.
10	Dambruck	Kenneth V.