Lista di kandidato pa elekshon 2021 di Movementu Progresivo
Movementu Progresivo a atraé un instituto ku a hasi e entrevistanan i a konsehá e komishon pa su posibel kandidatonan ku lo por a okupa e puestonan di 3-10.
Number 2 ta un palabrashon for di prinsipio. Esei tabata e kaso ku tur nos number 2 di pasado. Motibu ta ku 1 i 2 ta traha hopi serka ku otro. Assesment di nr dos a tuma lugá for di prinsipio.
E evaluashon a tuma lugá dor di un instituto independiente kaminda nr. 3 no ta forma parti di e board.
Ademas, pa separá aún posibel interferensia di interes, nr 3 a wòrdu evaluá tambe dor di un komishon interno di partido ku no ta riba lista.
E sekuensia di e lista ta a base di eksperensia, backround i den kua funshon e persona aki por funshoná.
Den e kuadro aki, sr. Cijntje su evaluashon di assesment a resultá ku e por okupá un puesto den e top 5.
Mirando ku MP a buska netamente un entidat eksterno pa evaluá i entrevista e posibel top 8 kandidatonan, pa evitá tur posibel spekulashon i posishonamentu djis paso ta amigu òf konosí, sr. Cijntje a risibí e rekomendashon di puesto basa riba su evaluashon.
Sr. Cijntje a nenga e puesto ku a ofresé.
Movementu Progresivo ta traha pa sirbi, mehorá i elevá nos pais paso Kòrsou meresé mihó. Nos ta deseá sr. Cijntje éksito pa futuro i danki pa su aporte.
Marilyn Moses, MD Lider Polítiko
Na momento ku pais Kòrsou a nase na 2010, nos komunidat a risibi e oportunidat pa rekonstruí su mes pa Kòrsou por elevá i lusi komo e pèrla den laman di Karibe. Esaki ta e vishon ku hopi di nos tin pa nos pais.
MP ta kere firmemente ku esaki ta posibel.
MP su vishon pa Kòrsou ta pa Kòrsou bira un sentro di edukashon i desaroyo komersial inovativo den e region di Karibe: Un núkleo di un ret, fuerte i resistente, fleksibel, interkonektá, ku ta un katalisadó pa desaroyo i kresementu progresivo i saludabel. Mishon di Movementu Progresivo ta pa krea e fundeshi pa den futuro, nos yunan por biba den un Pais ku tin un fundeshi sólido, íntegro, eksitoso i progresivo.
Pa por duna kontenido na e vishon i realisá e mishon aki Partido Movementu Progresivo a atraé hendenan ku amor pa Kòrsou i su komunidat. Un tim di hendenan íntegro, honesto i kapas pa presentá ideanan balansá, inovativo i finansieramente sano pa un desaroyo real, sostenibel i kontinuo pa nos pais i komunidat.
Riba e lista di MP ta rekonosé presensia di hendenan hóben ku ideanan nobo i inovativo i tambe hendenan madurá ku eksperensia den diferente área di konosementu i abilidat manera entre otro salubridat, ekonomia, enseñansa, teknologia, impuesto i asuntunan sosial i di famia.
E palabranan klave ku MP ta para pe ta: Puresa, Firmesa i Progreso.
Lider polítiko i ala bes number 1 riba e lista, dòkter Marilyn Moses, durante di mas ku 4 aña a demostrá esaki i awor ta kla pa tuma un reto mas grandi ainda. Dòkter Moses a rondoná su mes ku hendenan ku ta rekonosé Dios komo nan guia prinsipal i ku tin e mes un vishon i pashon pa e pais i komunidat di Kòrsou. E tim tin un base anchu ku hendenan ku tin karga pa asuntunan di salubridat, ekonomia, enseñansa, sosial, impuesto i famianan. E lista tin representantenan tambe di e sektor deportivo , kultura i sindikal. Pues un base kompleto ku por trata vários tópiko vigente. Den nos programa di akshon nos lo presentá nos ideanan kon pa desaroyá Kòrsou riba tur a áreanan relevante.