4 DI FEBRUARI TA DIA INTERNASHONAL DI KANSER
4 DI FEBRUARI TA DIA INTERNASHONAL DI KANSER
Willemstad – Djaweps dia 4 di febrüari 2021 ta Dia Internashonal di Kanser. E aña aki Minister Zita Jesus Leito i Ministerio di GMN tambe ta para ketu riba e dia aki, mirando ku e ta un dia importante den bida di hopi hende.
Kanser ta un enfermedat ku ta tuma lugá na momentu ku kambionan den un grupo di sèl normal tuma lugá den e kurpa i ta kondusí na un kresementu inkontrolá i apnòrmal, okashonando un bulto ku nos ta yama tumor. Esaki ta e kaso serka tur Kanser ku eksepshon di Leukemia (kanser di sanger). Si lag’é esaki sin atendé, e tumor por krese i plama banda di dje mediante e fluho di sanger i sistema linfátiko i por afektá e parti digestivo, parti nervioso i tambe e sistema sirkulatorio òf ta manda hormona ku ta afektá funshonamentu di e kurpa.
E tiponan di Kanser ku nos konosé ta: Carcinoma, Sarcoma, Lymphoma i Myeloma i Brain and spinal cord cancers.
Algun datos di Kanser mundial:
▪ 10 mion hende tur aña ta muri di Kanser.
▪ Alomenos un tersera parti di un Kanser nòrmal ta prevenibel.
▪ Kanser ta e di dos kousa di morto na mundu.
▪ 70% di mortonan di Kanser ta sosodé den paisnan den desaroyo.
Aki na Kòrsou tambe nos pueblo ta konfrontá su mes ku e malesa di Kanser. Nos mester kuida. Nos mester konstatá un bulto na tempu i laga trata esaki tempran. Na momentu ku nos konstatá un Kanser na tempu, ku ayudo médiko lo por prevení hopi.
Tumor di Kanser por keda dividí den tres grupo:
Benigno, Maligno òf Prekanseroso.
Un tumor benigno no ta kanseroso i no ta un menasa pa bida. Nan tin e tendensia di krese slou, nan no ta plama den otro partinan di e kurpa i ta konsistí di sèlnan ku ta similar na un sèl salú. Únikamente nan lo okashoná problema si nan bira grandi i ta bira inkonfortabel ora ku nan kuminsá primi riba órganonan. Por ehèmpel un tumor di selebre den kabes.
Un tumor maligno ta krese muchu mas lihé ku tumor benigno i tin e
abilidat di plama i destruí e tehidonan den su alrededor. Sèlnan di un tumor maligno por kibra for di e tumor primario i plama rònt e kurpa.
Tumor prekanseroso (òf premaligno) ta keda deskribí den kondishon ku ta envolví sèlnan apnòrmal ku ta desaroyá den kanser.
Awe riba Dia Mundial di Kanser, Ministerio di Salú, Medio Ambiente i Naturalesa kier a manda palabranan di forsa na kada un di nos pashèntnan lokal ku ta sufriendo di e malesa aki.