Prome Minister Evelyn Wever-Croes: BISHITA DI PROME MINISTER NA CACIQUE ATERIMA Proyecto Piloto ta duna resultado positivo den innovacion y enseñansa

Prome Minister Evelyn Wever-Croes:

 

BISHITA DI PROME MINISTER NA CACIQUE ATERIMA

Proyecto Piloto ta duna resultado positivo den innovacion y enseñansa

 

Diamars 2 di februari Prome Minister Evelyn Wever-Croes compaña pa Parlamentario Edgard Vrolijk a bishita Scol Preparatorio Aterima pa mira e avancenan den innovacion, y pa haya un bista con e muchanan ta hayando les na un manera mas interacivo. 

 

A traves di Futura, y den colaboracion cu SKOA y otro stakeholdersnan den enseñansa, den 2019 a diseña un Proyecto Piloto den educacion unda cu a inverti den entre otro eBoards pa klaslokaalnan na Cacique Macuarima Basisschool y tambe Scol Preparatorio Aterima. E resultadonan te cu awo ta sumamente positivo y door di e exito actualmente ta invertiendo den un di dos Proyecto Piloto pa sigui evalua e resultadonan, innova, y haci e experencia di e muchanan na scol uno mas interactivo.

 

Den su recorido na e scol, Premier Wever – Croes por a mira e borchinan C-touch den e klasnan y tambe con e maestronan ta duna les a traves di e borchi. Y a keda sumamente impresiona y emociona pa mira muchanan ta haya les den e forma aki. Nan tin hopi mas atencion, nan ta hopi mas envolvi cu e lesnan y e maestronan tambe cu a haci tur di nan parti pa nan por domina con pa traha cu e borchi y saca lo miho di dje pa e alumnonan. 

 

Maritza Carion – Cabesante Scol Preparatorio Cacique Aterima a expresa di ta hopi contento cu e proyecto di FUTURA, cual ta un paso grandi pa innovacion di e scol. E muchanan awor por traha for di e pantayanan cu ta touchscreen, y e maestronan ta desaroya diferente les y actividad den klas unda cu muchanan por haci les cu e C-touch. Den futuro lo desea pa tin tablets cu por conecta na e see-touch pa e mucha por haci uzo di dje den e forma aki tambe. 

 

Sra. Carrion a informa Prome Minister di un aspecto sumamente positivo di e proyecto cual ta, cu muchanan chikito ya caba ta prepara pa e avansenan digital. Pero tambe e gastonan cu tin ora di traha poster, print, lamina y uza ‘kopieermachine’, tur ta baha door di haci uzo di digitalisacion. Pues un inversion cu ta wak e beneficio riba diferente aspecto. 

 

Por ultimo, Premier Wever – Croes a bisa: ‘Ta spera cu a traves di e desaroyo aki ta creando un fundeshi pa nos muchanan a traves di innovacion, pa nan por yega mas leu den enseñansa. Mi ta hopi agradecido na tur esnan cu a haci e proyecto posibel y un palabra di aprecio y danki na e maestronan y cabesante di Cacique Aterima pa e bunita trabou cu nan ta haci’.