3 persona den ròlstul por haña transporte gratis kada siman pa bai hasi algu rekreativo  den proyekto di Fundashon Alton Paas.

3 persona den ròlstul por haña transporte gratis kada siman pa bai hasi algu rekreativo 

den proyekto di Fundashon Alton Paas.

.

 

WILLEMSTAD, Personanan ku ta uza ròlstul tambe meresé e oportunidat pa por sali i disfrutá teniendo kuenta ku e posibilidatnan ku tin aworaki. Pesei mes ku yudansa di Amigunan di Fundashon Alton Paas i diferente kompania, lo bai kuminsá un proyekto pa e sigiente 6 lunanan ku lo bai regalá kada siman transporte ida i buelta pa 3 persona den ròlstul ku lo bai sea landa, komé na un restaurant òf hasi un bishita. Tur esaki kompletamente gratis.

 

Nos tur ta konsiente di e efektonan di e pandemia aktual. Den kaso di personanan ku un desabilidat e impakto ta aun mas grandi. Normalmente ya kaba tin un barera haltu pa mayoria persona ku un desabilidat por a sali bai rekrea òf disfrutá di tur posibilidatnan ku tin pa nan na Kòrsou.

Awor ku e pandemia, e barera ei a bira hopi mas haltu. Hopi mas difisil pa e persona sali for di su isolashon na kas. Si nòrmal e sa haña yudansa di famia aworaki esaki por ta mas difisil. Pa kolmo no tin un bista por lo pronto di un mihó futuro.

 

Fundashon Alton Paas konforme su statutonan tin e meta pa fasilitá mobilidat liber di personanan ku dwarslaesie i otro tipo di paralisis usando su dos autonan ku yama Wheelee spesial pa transportá personanan den ròlstul. Esakinan tei spesial pa aktividatnan rekreativo. Si un hende ke bai misa, evento, hasi bishita, etc…

Sea ku ta mainta trempan, anochi lat òf asta riba dianan di fiesta. Pa asina yuda personanan ku un desabilidat partisipá aktivo den komunidat.

 

Mirando ku nos ta siñando kon pa biba den e normal nobo, ta importante pa personanan ku ta uza ròlstul tambe por haña chens di partisipá den e desaroyo aki. Pesei tur siman via un facebook live di Fundashon Alton Paas, lo saka nòmber di 3 persona den ròlstul pa bai sea landa, kome na un restaurant òf hasi un bishita usando Wheelee kompletamente gratis. Pa un persona por haña e chèns aki e mester subi riba nos website i yena e formulario ku su nòmber i number di telefon pa asina kada siman por saka nòmber di e 3 personanan. Si e persona mes den ròlstul no por yena e formulario e mes, e por laga un hende yena su nòmber.

 

Manera indiká ariba kaba lo bai tin 3 kaminda ku e persona por bai. E por bai landa bou di guia di un aquatic therapist ku lo sosodé na Wet&Wild-Boulevard. Tin 3 restaurant ku a uní den e proyekto kual ta Gondola Restaurant na Riffort, Muse Restaurant na Villapark Fontein i Greenhouse na Boulevard.

 

Fundashon Alton Paas ta hopi kontentu i agradesido na tur e Amigunan ku a kontribuí pa hasi esaki posibel i alabes tambe tur e organisashonnan ku a skohé di forma parti di e proyekto.

 

Pa haña e formulario por manda nos un whatsapp na 5100087 i nos ta manda e link di e formulario pa e personanan den ròlstul mes por yena òf si tin un persona ku lo bai yené na su nòmber. Tambe por haña e link via nos website òf Facebook. 

This site uses Akismet to reduce spam. Learn how your comment data is processed.

error: Content is protected !!
%d bloggers like this: