𝐍𝐨𝐬 𝐢𝐧𝐝𝐮𝐬𝐭𝐫𝐢𝐚 𝐥𝐨𝐤𝐚𝐥, 𝐧𝐨𝐬 𝐨𝐫𝐠𝐮𝐲𝐨, 𝐧𝐨𝐬 𝐟𝐮𝐭𝐮𝐫𝐨!

Dia 15 di òktober último, Ministerio di Desaroyo Ekonómiko (MEO), huntu ku Curaçao Manufacturers Association – CMA, a reuní fabrikantenan lokal i partnernan importante durante Dia Nashonal di Industria Lokal 2026, na Innovation Hub Kòrsou.

Durante e dia, nos a wak e progreso di nos industria lokal i papia tokante kon nos por sigui fortalesé e sektor. Atenshon a bai, entre otro, na inovashon, desaroyo di personal ku e abilidatnan nesesario, redukshon di gastunan di hasi negoshi i oportunidatnan pa bende nos produktonan na merkadonan internashonal.

Pa MEO, un industria lokal fuerte ta nifiká mas oportunidat pa nos empresanan, mas trabou i un ekonomia mas fuerte pa Kòrsou. Pa logra esaki, kolaborashon entre gobièrnu, fabrikantenan i otro partnernan ta esensial.

Nos ta orguyoso di nos fabrikantenan lokal i di tur esnan ku kada dia ta kontribuí na kresementu di e sektor.

Ban sigui konstruí riba loke nos ta produsí aki, pa un Kòrsou ku mas oportunidat pa tur hende!

Wak algun momento di Dia Nashonal di Industria Lokal 2026.