CBCS den partnership ku FNA pa desaroyo di Teknologia di Supervishon

CBCS den partnership ku FNA pa desaroyo di Teknologia di Supervishon
Willemstad/Philipsburg – Centrale Bank van Curaçao en Sint Maarten (CBCS) i Financial Network
Analytics Ltd. (FNA) ku plaser ta anunsiá inisio di un partnership kolaborativo nobo ku e meta di
desaroyá kapasidat avansá riba tereno di Teknologia di Supervishon (SupTech).
Den kuadro di su trayekto di inovashon, CBCS, bou di guia di su Plataforma di Inovashon, ta
adoptando teknologia nobo i desaroyando su kapasidat di SupTech, i FNA a komprometé nan mes
pa sostené e desaroyo akí ku nan ekspertisio riba tereno di ekstrakshon di dato, análisis avansá di
dato i training. Ku e meta ei, FNA ta bai produsí un serie di kurso interno i públiko, i duna e
spesialistanan di CBCS akseso na su plataforma di software i análisis di dato.
FNA ta un empresa di deep technology spesialisá den análisis avansá di dato i simulashon di ret, i un
lider riba tereno di Teknologia di Supervishon (SupTech) i Teknologia Regulatorio (RegTech). FNA
su klientela ta inkluí e bankonan sentral di mas grandi na mundu i institutonan di supervishon
finansiero na diferente parti di kontinente amerikano, Europa, Áfrika i Asia. Algun di FNA su
klientenan ta Bank of England, the Office of Financial Research (di US Department of Treasury, ku
ta e ministerio di finansa estadounidense), Payments Canada, Banco de la República (di Colombia) i
Hong Kong Monetary Authority.
E solushonnan di SupTech i RegTech ku FNA ta ofresé a risibí rekonosementu mediante vários
premio i distinshon den sektor finansiero, inkluso na e promé G20 TechSprint, na 2020, den e
kategoria di ‘Interkambio Dinámiko di Dato pa Supervisor i Reguladó pa atendé ku Situashon di
Krísis’. Tambe nan a keda elegí komo Best Data Analytics Partner den kuadro di FinTech &
RegTech Global Awards 2020 di e publikashon Central Banking.
Segun Kimmo Soramaki, fundadó i CEO di FNA: ‘Nos ta felis i honrá ku CBCS a invitá FNA pa
sostené su Plataforma di Inovashon den desaroyo di su aktividatnan di SupTech. CBCS a alkansá
diferente logro importante resientemente riba tereno di inovashon, entre otro, kreashon di su
Plataforma di Inovashon interno, ku ta fungi komo un hub pa inovashon. Nos ekspertonan den
materia i spesialistanan di SupTech ta antisipá un kolaborashon sumamente interesante i un
partnership ku lo resultá den benefisio mutuo.’
Segun Leila Matroos-Lasten, Direktor Ehekutivo di CBCS: ‘CBCS ta komprometí pa sigui eksplorá,
atraves di su Plataforma di Inovashon, e oportunidatnan ku inovashon i teknologia por brinda pa
amplia su kapasidat di supervishon, su agilidat komo reguladó i su kapasidat analítiko. CBCS ta
masha kontentu di por kolaborá i risibí sosten di FNA, un lider internashonal rekonosí riba tereno di
SupTech’.
Willemstad, 11 di febrüari 2021
CENTRALE BANK VAN CURAÇAO EN SINT MAARTEN

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: