Entrega di yabi di kas den proyekto PPP na Bonam

Entrega di yabi di kas den proyekto PPP na Bonam

Geplaatst op 11 March 2021 dor di Ministerio Tráfiko, Transporte i Planifikashon Urbano

 

 

Willlemstad – Un suidadano mas a mira su deseo kumplí na momentu ku el a risibí yabi di su propio kas den e proyekto PPP na Bonam.

Gobièrnu di Kòrsou a firma un akuerdo den pasado ku e kontratista Raemark Development Company N.V. pa desaroyá algun kas pa pueblo. E proyekto aki ta estilo di Public Private Partnership (PPP) kaminda gobièrnu ta pone tereno na disposishon di un desaroyadó. E desaroyadó na su turno ta traha kas i ta bende esakinan konformé e reglanan stipulá pa gobièrnu.

Den e kaso aki, e kontratista Raemark Development Company a haña tereno na Bonam, spesifikamente Kaya Misa Alegre kaminda ya kaba nan a konstruí 12 kas miéntras ku 6 otro ta den konstrukshon. Domeinbeheer a hasi di su parti pa loke ta entrega di tereno den ‘erfpacht’ i ROP pa loke ta trata aprobashon di e plan i entrega di pèrmit di konstrukshon.

Ku e tipo di proyektonan PPP aki, Gobièrnu ta purba pa via di un òf otro desaroyadó, konstruí kas pa komunidat i asina yuda baha e lista di hendenan ku ta den nesesidat di un kas propio.

Minister di VVRP sra. Zita Jesus-Leito ta sumamente kontentu ku por a hasi un famia mas kontentu ku nan propio kas.