Tirzo Martha ta aseptá rekonosementu! Proyekto Piloto Skol pa Desaroyo integral na Prinses Margrietschool ta haña su nòmber! 

 

Tirzo Martha ta aseptá rekonosementu! Proyekto Piloto Skol pa Desaroyo integral na Prinses Margrietschool ta haña su nòmber! 

 

WILLEMSTAD- Dia 16 mart 2021 mainta Gobièrnu di Kòrsou representá pa Minister di Enseñansa, Siensia, Kultura i Deporte sr. Steven Croes, Promé Minister di Kòrsou sr. Eugenne Rhuggenaath huntu ku nos gran artista visual ku renombre internashonal Tirzo Martha, a bishitá e skol Prinses Margriet na Buena Vista pa tuma nota di e desaroyonan rondó di e proyekto Skol pa Desaroyo Integral na hulandes e asina yamá Integraal Kindcentrum. E bishita tabatin komo meta tambe pa hasi e pregunta na sr Tirzo Martha ku e ta aseptá e rekonosementu di Gobièrnu di Kòrsou pa duna e konsepto di Skol pa Desaroyo Integral e nòmber di Tirzo Martha.

 

Kòrsou ta pará dilanti di otro kambio positivo den nos enseñansa ku mester yuda halsa kalidat di nos enseñansa, esta e proyekto den kual 6 skol piloto, ta introdusí e asina yama ‘Skol pa Desaroyo Integral”. Ta un konsepto nobo kaminda nos ta ban traha riba un liña di siña kontinuo (‘doorlopende lijn’) ku ta konektá enseñansa pre-eskolar, enseñansa regular na skol i edukashon después di skol ( naschoolse educatie) huntu ku otro. Banda di esaki, diferente organisashonnan den bario manera sentro di bario, sentronan kultural, organisashonnan di den bario, organisashonnan no gubernamental, federashonnan deportivo i tambe empresanan den sektor privá, ta keda involví. Meta di e forma di traha huntu akí ta pa kada alumno:

• haña mas chèns pa desaroyá trahando ku proyektonan di forma ku áreanan di edukashon ta keda integrá;
• pa e por desaroyá su mes mas amplio posibel usando tur su talentonan i áreanan di interes; i 
• pa por duna mas atenshon na e bienestar i un desaroyo sano di kada mucha. 

Saliendo for di aserkamentunan manera Whole School, Whole Community, Whole Child i “Teach Them Young”, den e proyekto akí, ta bai konsentrá alabes riba desaroyo di diferente abilidatnan ku nos muchanan tin mester pa nan por funshoná den e komunidat di mañan. P’esei, banda di siña nos norma i balornan, nos kultura, den e proyekto akí lo pone mas atenshon tambe riba abilidatnan manera: 

• Siña kolaborá ku otro i siña ku kolaborando di un forma pasífiko i huisioso nos por yega huntu na solushon di tur reto;
• Siña desaroyá pashon pa siensia, teknologia i matemátika, di moda ku nan mes ta siña investigá i yega na solushon;
• Siña kon desaroyá un aktitut empresarial, siña deskubrí oportunidat, tribi di tuma riesgo i tribi di tuma desishon nan mes;
• I natural siña kon importante ta pa move sufisientemente di forma variá i siña nan kon importante ta pa kome salú, biba salú i partisipá aktivamente den deporte. 

 

Poniendo atenshon riba un artista manera Tirzo Martha Gobièrnu ta duna atenshon tambe na desaroyo di e potensial di arte. Tirzo Martha ta fungi komo modelo pa nos muchanan sa ku uzando bo kreatividat tambe bo por yega leu den bida manera Tirzo Martha ku tin su obra nan di arte riba plataforma internashonal tambe.

 

Tirzo ta ehèmpel pa kreatividat, kolaborashon, perseveransia i dedikashon. 

Meta di tin un “role model” pa nos skolnan pa desaroyo integral ta pa e muchanan tin un modelo pa wak riba dje i konektá na dje ku lo inspirá nan ku nan balornan ku nan a desplegá den bida. Di e forma akí nos ta duna kontenido tambe di traspaso di norma, balornan, konosementu i konsiensia kultural den nos skol pa desaroyo Integral 

Algun obra di Tirzo Martha ku a haña tambe vários rekonosementu, por a keda apresiá na entre otro Museum Beelden Aan Zee (Den Haag), het Tropenmuseum (Amsterdam) i The Patricia and Phillip Frost Art Museum (Miami).

 

Mirando e logronan di Tirzo Martha Gobièrnu di Kòrsou a tuma e desishon pa nombra e kombinashon di sentro pre-eskolar, edukashon despues di ora di skol i e skol di Fundeshi Prinses Margrietschool na “Skol pa desroyo Integral Tirzo Martha”. Tirzo Martha a aseptá e rekonosementu akí.