Minister demisionario di Enseñansa, Siensia, Kultura i Deporte (ESKD) di bishita serka e gran pintor di Kòrsou, Jean Girigori

 

Minister demisionario di Enseñansa, Siensia, Kultura i Deporte (ESKD) di bishita serka e gran pintor di Kòrsou, Jean Girigori

 

Willemstad- Minister demisionario di Enseñansa, Siensia, Kultura i Deporte (ESKD), Steven Croes, den su delaster simannan komo minister, ketubai ta dediká parti di su wikènt pa duna atenshon na baluartenan di Kòrsou.

 

Djasabra 8 di mei último a toka turnu na e gran pintor, Jean Girigori, konosí den komunidat di Kòrsou i internashonal pa su obranan eksepshonal. Den ambiente di su kas, yená ku masha hopi pintura, di un forma masha habrí Jean a konta tokante su bida. Jean mes ta bisa ku nunka ela siña pinta i e no tin un direkshon spesífiko. Mas importante ta e sentimuntu ku un hende tin pa hasi algu i pa stima hende. Un hende mester tin amor pa su patria i hasi kos pa su pais bai dilanti. Tambe e ta haña importante pa tur lokual un hende hasi ta ku intenshon pa uni e pueblo. Ela kombersá ampliamente tokante polítika na Kòrsou i komportashon di nos polítikonan. Pa Jean ta importante pa pueblo di Kòrsou uni i traha huntu pa mehorá nos situashon. Kòrsou ta pará dilanti hopi desafío aworaki i ta aun mas importante pa uni e pueblo i traha huntu, segun Jean Girigori.

 

Durante su bida Jean a sa di transformá tur eksperensia traumátiko i doloroso ku ela pasa aden den algu positivo via su arte. Pesei e ta boga pa siña nos hòbennan arte, pa drenta barionan di Kòrsou i laga nan siña pinta kosnan di nan bario. Su deseo ta pa su kas bira un museo den banda ariba i pa hòbennan bin hasi uso di su kurá di kas bin siña planta tambe. Jean falta un pia pero esei nunka a strobépa e sigui pinta. E tin un energia enorme ku e ke usa pa kombersá i duna konseho na tur hende, speshalmente hòbennan.  Jean ta kere ku minister demisionario di Enseñansa, Siensia, Kultura i Deporte (ESKD), Steven Croes ku su karisma i aura positivo, ta e persona adekuá pa stimulá  hòbennan pa hasi arte i kere den nan talento. Aktualmente Jean ta trahando riba su propio liña di produkshon pa artíkulonan lokual manera tapa boka i beker. Na final di e bishita ela entrega un buki na minister Steven Croes, ku a keda impreshoná pa e obranan ku ela mira i tur konseho ku Jean a duné. Esaki sigur tabata un bishita kaminda a mustra un bia mas riba e importansia pa siña mucha fo’i chikí  ku kada hende tin su propio talento i ku TUR talento ta mes importante, pues di igual balor.

Share this page to Telegram

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: