“Trabou pa Kòrsou (TPK) a atvertí CURMIL”
Trabou pa Kòrsou a atvertí CURMIL
Awor ku baka a hoga na pos, ken ta yudabu? No wòri, TPK mes tei.
2 siman pasá Trabou pa Kòrsou (TPK) a puntra CURMIL, dia un vehíkulo no para, kiko bo ta hasi? Apenas 2 siman pasá TPK a manda karta i hala atenson riba e echo di militarnan hulandes baret kòrá i militarnan di Curmil ku ta hasiendo kontròlnan durante di pandemia. Tambe TPK a atvert Curmil riba e echo ku nan no tin tur e preparashon nesesario pa hasi e loke nan ta hasiendo ei debí ku nan no a haña ‘praktisch politie optreden’ ni nan no tin IBT i dia algu bai robes esnan responsabel di mandabu hasi e trabou lo no sali na bo defensa.
Wikènt ku a kaba di pasa tur hende por a tuma nota riba media sosial di un video ku ta sirkulá kaminda un militar di Curmil ta hasi un maniobra nèt dilanti di un “scooter” ku konsekuensia ku e shofùr di e “scooter” a perde kontròl i aksidentá. E shofùr a sufri diferente leshon. Lider polítiko di TPK, sr. Rennox Calmes, ku sigur tin 12 aña di eksperensia den a trabou polisial tambe a mira e video aki. TPK no ta bai den detayes di e echo i ta warda investigashon determiná resultado final.
Pero TPK ta aksentuá di a hasi e pregunta públikamente 2 siman pasá. Kiko CURMIL lo hasi dia un vehíkulo no para? Si ta loke nos a mira riba e video, nos ta hopi leu for di kas. TPK lo no hala patras, pero lo sigui kana e kamindanan den parlamento pa hasi e kosnan stret paso alfinal CURMIL ta di nos i no por para laga nan pasa den situashon ferfelu siendo ku nan tambe ta òrdu nan ta sigui di ariba. TPK ta bai atendé direktamente ku esnan ku a duna CURMIL òrdu i pone nan den e situashon ferfelu aki di kual algun di nan den nan emoshon pa sirbi nan pais no a para ketu na nos leinan. TPK ta pendiente kontesta di e kartanan ku TPK a manda pa minister di hustisia i minister presidente.
