Dia 31 di mei ta Dia Mundial Anti Tabako

Dia 31 di mei ta Dia Mundial Anti Tabako

Willemstad – Organisashon Mundial di Salú (WHO) na 1987 a bini ku e inisiativa pa proklamá dia 31 di mei komo Dia Mundial Anti Tabako. Riba e fecha aki rònt mundu organisashonnan ku ta traha den kuido i salú públiko ta enfoká riba e peliger ku humamentu ta trese pa salú i alabes promové e nesesidat pa introdusí mas restrikshon den uso di tabako. Meta prinsipal di e kampaña aki ta pa konsientisá komunidatnan riba e peliger di uzo di tabako i e impakto negativo riba salú di hende. P’esei rònt mundu organisashonnan di salú ta pone antenshon na e tópiko importante aki.

Ministerio di Salú, Medio Ambiente i Naturalesa ta informá komunidat di e peligernan ku konsumo di tabako tin, pero tambe e benefisionan di stòp di huma. Konsumo di tabako ta kousa problemanan serio di salú ku ta evitabel, Humamentu ta keda faktor di riesgo pa diferente di e malesanan króniko manera kanser, diabétis , malesa di ardu di kurason. A keda probá ku tabako ta e kousa di mas ku 8 millon morto na mundu tur aña. A keda demostrá tambe ku e humadó tin mas chèns pa desaroyá Covid- 19 den su forma severo, kompará ku personanan ku no ta huma. Pues mas motibu pa stòp di huma.

Stòp di huma ta trese benefisio pa salú pero tambe finansiero. Momentu un persona stòp di huma, 20 minüt despues ya kaba e por sinti efekto riba su salú. Despues di 12 ora e konsentrashon di koolmomoxide den sanger ta bira nòrmal. Den e di dos i di tres siman e sirkulashon i funshon di pulmon ya a kuminsá mehorá. Ministerio di Salú, Medio Ambiente i Naturalesa ta enkurashá bo stòp di huma, baha di peso i move mas kual lo tin impakto positivo riba bo salú. Esaki lo baha e karga di malesa króniko riba nos komunidat drástikamente.