SINDIKATO DOEN *”NOS A REUNÍ KU MINISTER I PALABRÁ MESORA UN ‘FOLLOW UP’!”*

SINDIKATO DOEN
*”NOS A REUNÍ KU MINISTER I PALABRÁ MESORA UN ‘FOLLOW UP’!”*
Sindikato DOEN den siman tras di lomba a reuní ku minister van Heydoorn. “E reunion tabata un reunion pa sera konosí, pero nos a probechá mesora pa palabrá reunionnan di ‘follow up’ pa profundisá riba e tópikonan ku nos a trese dilanti”
Minister van Heydoorn a duna un splikashon amplio di kiko e komo minister tin pensá na hasi durante su periodo di gobernashon pa salbaguardiá nos enseñansa i pues hasi enseñansa prioridat komparabel ku e karteranan di finansas i ekonomia.
Den e kuadro akí Sindikato DOEN a para ketu tantu riba aspektonan individual ku ta regardá nos miembronan komo aspektonan general.
*”Situashon Aktual!”*
Konsiderando e impakto ku Covid tabata tin riba e aña eskolar tras di lomba i tambe e konsekuenshanan ku esaki lo trese kuné den e próksimo añanan eskolar Sindikato DOEN a proponé na minister algun idea kon pa atendé riba término kòrtiku ku e situashon den nos enseñansa. Un di e ideanan ta pa meskos ku a bini ku esepshonnan den norma pa e.o. èksamen, pa hasi di henter aña eskolarnan ku ta bini un esepshon. Ku otro palabra tanten no tin sufisiente sèn pa bini ku un maneho riba término kòrtiku kaminda ta tene kuenta ku e konsekuenshanan di un aña eskolar tras di lomba den pandemia, sin ku a invertí den enseñansa, sin ku a invertí den e trahadónan den enseñansa, sin ku a duna vèlt di enseñansa e guia nesesario i ku pues tur pero tur kos a kai den skochi di vèlt. Kon, kiko i riba kua aspekto nos a palabrá ku minister ku nos lo pone esaki riba papel pa den e reunion di ‘follow up’ ariba menshoná profundisá riba esakinan.
*”Fakansi Grandi di Mas Kòrtiku den historia!”*
Un di e puntonan agudo ku Sindikato DOEN a pone na atenshon di minister ta ku despues di e aña eskolar mas pisá ku nos a konosé den historia di humanidat, aki na Kòrsou nos ta bai haña e fakansi grandi di mas kòrtiku den historia.
Konsiderando e impakto ku e pandemia akí tin riba nos tur, esta alumno, studiante, maestro i mayor, e fakansi grandi akí mas ku nunka ta hopi importante pa tur e aktornan ya menshoná embolbí por rekuperá e energia i pas mental nesesario pa dil ku e aña eskolar nobo ku tambe lo ta un aña eskolar den pandemia. Riba esaki minister a indiká ku e tin atenshon pa e aspekto akí pero no por duna un ‘uitspraak’ ainda.
*”Partisipashon Sindikal”*
Finalmente nos a palabrá ku nos ta habrí pa traha huntu na bienestar di nos miembronan i di nos enseñansa i ku den e kuadro akí e partisipashon di nos komo sindikato representando trahadónan den enseñansa ta fundamental. Pa loke ta trata esaki minister van Heydoorn a indiká, tambe públikamente, ku e lo duna tur sindikato partisipashon ya komo ku ta e trahadó so por disidí kua sindikato ta represent’é i no minister òf dunadó di trabou. Esaki ta loke ILO of OIT (Organisashon Internashonal di Trahadó) ta indiká den kuadro di derechinan humano ankrá den tratadonan internashonal. Ta basá riba e tratado akí por sierto Sindikato SEU di aqualectra a gana kaso kontra gerensia di aqualectra na momento ku gerensia no tabata ke rekonos’é ni tampoko duna Sindikato SEU partisipashon.
*”Trabou Tin! DOEN!”*
Pues aworaki nos ta trahando riba loke nos a palabrá ku minister, pendiente pa e reunion di ‘follow up’ ariba menshoná. “Trabou tin; pues ta ora pa DOEN!”
*Direktiva di Sindikato DOEN*
12 di yüli 2021

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: