Cpost International N.V.  ta lansa seri di stampia Edifisionan Religioso 2021

Cpost International N.V.  ta lansa seri di stampia Edifisionan Religioso 2021

Willemstad, 12 Ougùstùs 2021 — Cpost International N.V. ta presentá ”Edifisionan Religioso di Kòrsou”, un seri di stampia úniko di edifisionan di e kuater movementunan religioso na Kòrsou.

Semper kreyentenan Kristian (Katóliko i Protestant), Hindu, Hudiu i di Islam a biba huntu di un forma pasífiko i liber pa práktika nan fe aki na Kòrsou. Rònt nos isla, nan kasnan di devoshon ta representá  un espasio seif kaminda fielnan por bini huntu pa selebrá nan fe den nan seno. Ku lansamentu di e stampianan aki, Cpost International N.V. ta orguyoso di por tira lus riba i selebrá Kòrsou su diversidat religioso.

Diseño di e seri di stampia Edifisionan Religioso di Kòrsou

Kada edifisio religioso lo tin un stampia kategoria 1 ku ta presentá interior i kategoria 2 ku ta presentá e eksterior di e edifisio. E seri di stampia ta konsistí di un total di 5 edifisio religioso.

E edifisio ku ta representá Katolisismo ta e misa Katóliko estilo Neo-Gótiko na Willibrordus ku a keda konstruí di 1884 pa 1888 i ku ainda ta operashonal. Kreyentenan ainda ta kongregá tur djadumingu na e edifisio koló pastèl ku ta sobresalí for di un distansia.

E edifisio di Misa Protestant Uní, mihó konosí komo ‘Fortkerk’ tambe ta parti di e seri di stampia. E misa ta alabes un monumento históriko i museo, kaminda por siña mas di e historia riku di e edifisio ku na diferente momentu den historia mester a enfrentá invashon Spaño, Ingles i Hulandes.

Un diaspora Indio bastante grandi ta yama Kòrsou nan kas. E úniko tèmpel Hindu na Kòrsou a keda konstruí na aña 2004 i ta lokalisá den area di Sorsaka. Den e tempèl, kreyentenan Hindu ta yama danki i ta ofresé dedikashonnan na e diferente diosnan di e religion Hindú.

Den kurason di Otrobanda por atmirá e minaret di e meskita Omar Bin Al-Khattab (1964) djaleu. E meskita ta un di e proménan den region i ta yama bon biní na musulmannan fiel ku ta topa pa alabá tur djabièrne i durante e festival i selebrashonnan religioso di kalènder islámiko.

Mikve Israel-Emanuel Synagogue ta un institushon konosí den hemisfera oksidental komo e tèmpel di mas bieu (1732) ainda den operashon. Konforme tradishonnan Spañó i Portugues, e vlür di e tèmpel ta tapá ku santu. Esaki ta un atrakshon pa bishitantenan for di yen destinashon.

Kolektá e seri di stampia úniko aki

E interior i eksterior di e 5 edifisionan spesial aki tur ta forma parti di e seri di stampia diseñá pa artista Max van Aalst. Ta enkurashá tur interesado pa bishitá e brènchnan di Cpost International N.V. na Groot Kwartier, Punda, Paseata i Otrobanda òf pa subi www.cpostinternational.com pa kumpra e stampianan.

 

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: