Reakshon riba komunikado di prensa di Parman International B.V. riba benta di Banco di Caribe

 

Reakshon riba komunikado di prensa di Parman International B.V. riba benta di Banco di Caribe

WILLEMSTAD/PHILIPSBURG – En bista di e komunikado di prensa di Parman International B.V.
(Parman) di dia 16 di sèptèmber 2021, Centrale Bank van Curaçao en Sint Maarten (CBCS) ta
konsiderá ku ta importante pa aklará lo siguiente.
Den kuadro di e proposishon pa bende e akshonnan di Banco di Caribe (BdC), CBCS a organisá un
reunion di akshonista dia 25 di mei 2021. Huntu ku e konvokashon pa e reunion ei, Parman, komo
akshonista di Ennia Caribe Holding N.V., a risibí un splikashon por eskrito di e agènda. Parman no a
presentá i, debí na esei, no tabata posibel pa adoptá resolushon na e reunion. Den un kaso asina, lei ta
preskribí ku CBCS mes, komo e outoridat kompetente den kuadro di e areglo di emergensia, por tuma
e desishonnan nesesario. CBCS a hasi uso di e previshon ei di lei di manera ku benta di e akshonnan
di BdC por tuma lugá.
Den un huisio sumario na mei di e aña akí tambe Parman a pidi Korte prohibí CBCS di bende aktivo
di grupo Ennia (manera BdC). Den su desishon den e huisio sumario ei, dia 28 di mei 2021
(CUR202101147), hues a rechasá e demanda ei (komo tambe e otro demandanan di Parman),
husgando ku e outorisashon ku CBCS a risibí den kuadro di e areglo di emergensia ta abarká benta di
aktivo tambe.
E komentarionan den Parman su komunikado di prensa, esta, ku grupo Ennia su situashon finansiero
lo tabata ekselente na momento ku e areglo di emergensia a drenta na vigor, ta masha leu for di realidat.
E simpel echo ku hues a emití e areglo di emergensia ya ta mustra esei. Es mas, un investigashon a
fondo ku CBCS a realisá unabes ku e areglo di emergensia a keda dekretá a bin saka na kla ku e
défisitnan tabata mas grandi ku loke a premirá. E défisitnan ei a bini debí na retiro masal i ilísito di
fondo ku mas bien mester a keda invertí na un manera rendabel na benefisio di e doñonan di pólisa.
Pa por haña kompensashon pa e retironan ilísito, CBCS, na nòmber di Ennia, a entamá un kaso den
korte dia 11 di òktober 2019 kontra diferente persona, entre otro Sr. Ansary, komo esnan responsabel
pa e défisitnan. Defensa di e kaso ei den korte ta planiá pa dia 14 i 15 di òktober 2021.
Na diferente okashon den e último añanan, a purba di yega na un solushon pa Ennia su défisitnan
grandi den konsulta ku Sr. Ansary. No opstante, te dia djawe, Sr. Ansary no ta rekonosé ku e problema

ta eksistí ni su embergadura. Parman su komunikado di prensa di 16 di sèptèmber 2021 ta un evidensia
mas di esei. Tur e tempu akí, Sr. Ansary no a duna niun indikashon di ta tene kuenta ku interes di e
doñonan di pólisa i, pues, ku e interesnan di Kòrsou i Sint Maarten.
CBCS ta karga responsabilidat outónomo pa implementashon di e areglo di emergensia na Ennia. For
di kuminsamentu, CBCS a hasi esei di e manera mas kuidadoso i profeshonal posibel, buskando
asistensia di diferente eksperto eksterno. Esei mes tabata e kaso tambe den e proseso ku a hiba na
benta di BdC.

Willemstad, 20 di sèptèmber di 2021
CENTRALE BANK VAN CURAÇAO EN SINT MAARTEN

 

Share this page to Telegram

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: