Enkuesta bou di empresanan tokante negosiashonnan di akuerdonan di komèrsio bilateral

 

Enkuesta bou di empresanan tokante negosiashonnan di akuerdonan di komèrsio bilateral

Geplaatst op 22 September 2021 dor di Ministerio Desaroyo Ekonómiko

WILLEMSTAD – Ministerio di Desaroyo Ekonómiko (MEO) ta trahando aktivamente pa sigui ekspandé nos merkado, entre otro pa medio di akuerdonan di komèrsio bilateral ku otro paisnan. Base pa e akuerdonan di komèrsio bilateral, mester ta un bista real di nos situashon aktual komo pais i kon nos empresanan lokal ta pará den e trayekto akí. Pues pa por logra esaki, MEO ta aserkando empresanan lokal ku un enkuesta pa asina haña un mihó bista riba e interes i disponibilidat pa yega na ampliashon di eksportashon.

 

Pa Kòrsou e akuerdonan bilateral lo mester resultá den mihó relashon komersial ku e respektivo paisnan ku ta parti di e akuerdo den término di e.o. eliminashon di aktual bareranan den transakshonnan komersial i aseptashon mutuo di otro su profeshonalnan. Enfoke di e enkuesta lo ta tantu riba empresanan lokal ku ya ta eksportá komo esnan ku kisas tin e intenshon pa eksportá den futuro. Den e enkuesta MEO ta enfoká no solamente pa haña un mihó bista riba e tipo di empresanan i e diferente sektornan, pero tambe ta bai a fondo riba e estadístikanan aktual di eksportashon di e empresa. Tambe ta duna informashon amplio tokante e akuerdonan di komèrsio bilateral. Resultado di e enkuesta akí lo mester kontribuí na puntonan di negosiashon ku paisnan, mihó kontenido pa ku futuro akuerdonan riba e tópiko i un ekspanshon duradero di nos merkado.

 

Eksportashon ta esensial pa kresementu ekonómiko

Kòrsou pa definishon ta un pais eksportadó. Nos ekonomia ta basá riba eksportashon di servisio i nos tabata fuerte den esaki. Nos refineria, nos haf, servisionan di logístika, aviashon, servisionan finansiero internashonal, turismo i zona franka ta ehèmpelnan di eksportashon di servisio ku a kontribuí na Kòrsou su ekonomia i a sòru pa nos tin un nivel di bida haltu kompará ku otro paisnan den nos region. Eksportashon di produkto tambe a kontribuí na nos ekonomia durante añanan. Pero eksportashon di produkto ta enserá mihó akseso na e merkado, retonan pa kombatí bareranan tékniko i nos fabrikantenan mester invertí den ahuste di nan produktonan pa por kumpli ku demandanan riba merkadonan internashonal. Esaki no ta un ehersisio fásil.

 

Netamente pa e motibu ei, gobièrnunan di diferente pais ta sera akuerdonan komersial pa fasilitá un akseso preferensial i eliminá bareranan tékniko ku ta eksistí, banda di fasilitá entrada di e produktonan riba merkado internashonal. Tur sobrá ta dependé di e dinámika di ofertanan i e demanda pa e produktonan. Ku otro palabra, nos por mira frutanan di e akuerdo komersial a base di e demanda riba e merkado internashonal i e abilidat di e empresa eksportadó di Kòrsou pa berdaderamente probechá di e demanda akí.

 

E enkuesta aktual ta duna MEO un mihó bista di e estado i kapasidat di e empresanan i kiko nan plannan ta pa futuro serkano, mediano i a largo plaso. Ta importante semper pa tene na kuenta ku un akuerdo komersial ta funshoná di ámbos banda; esta ku paisnan ta duna mesun nivel di akseso na otro. E kondishonnan di e kolaborashon mutuo akí ta keda palabrá den un akuerdo.

 

MEO a kuminsá manda e enkuesta digitalmente pa kada empresa entrante djárason 22 di sèptèmber i tambe lo hasi un bishita personal den e siman benidero pa finalisá e proseso huntu ku e empresanan lokal. For di awor MEO ta gradisí kada empresario ku duna su kolaborashon na e proseso akí.

Share this page to Telegram

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: