CMC a kuminsá e siman aki ku tratamentunan elektivo pa pashèntnan di SVB

Willemstad, 1 di novèmber, 2021 – For di momentu ku Ministerio di Salubridat a konfirmá fondo pa kubri gastunan di pashèntnan elektivo di SVB pa luna di novèmber, Curaçao Medical Center (CMC) a kuminsá planifiká e tratamentunan. Manera a anunsiá siman pasa, awe riba djaluna 1 di novèmber a kuminsá ku operashonnan di e promé grupo di pashèntnan. Un total di 47 pashènt ta planiá pa e siman aki, di kual 33 ta di SVB.

Departamentu di Planifikashon ta traha den estrecho kolaborashon ku spesialistanan pa pasa dor di e lista di espera i duna prioridat na esnan ku mester operá ku mas urgensia. E departamentu ta kalkulá ku lo por operá mas o ménos 300 pashènt den e luna di novèmber di kual 240 lo ta pashènt di SVB. En total tin un lista di espera di 1,646 pashènt (1,539 di SVB).